Nikolla takim me Kryetarin e Parlamentit të Arabisë Saudite: Miqësi e fortë!

Kryetarja e Kuvendit të Shqipërisë, Lindita Nikolla, u takua sot me Kryetarin e Parlamentit të Arabisë Saudite, Abdullah Al-Sheikh dhe delegacionin që e shoqëron, i cili ndodhet për një vizitë zyrtare në Shqipëri.

Gjatë takimit u bisedua mbi nxitjen e bashkëpunimit dypalësh, marrëdhënieve shumë të mira politike, ekonomike e parlamentare mes dy vendeve.

Kryetarja Nikolla i shprehu kolegut saudit mirënjohjen për ndihmën financiare dhënë Shqipërisë ndër vite, për financimin e projekteve të rëndësishme infrastrukturore dhe interesin e shtuar të kompanive saudite për të konsideruar investimin në Shqipëri në fushat e energjisë, turizmit, bujqësisë, agro-biznesit, minierave etj.

Nikolla nënvizoi se “Dy vendet tona do të zgjerojnë bashkëpunimin e gjithanshëm politik, ekonomik e parlamentar, do të intensifikojnë luftën kundër krimit, terrorizmit, radikalizmit dhe ekstremizmit, për mbrojtjen e paqes sigurisë.”

Po ashtu kryetarja Nikolla i shprehu Kryetarit Al-Sheikh mirënjohjen për njohjen dhe mbështetjen e Kosovës nga Arabia Saudite në kërkesat për anëtarësim në UNESCO, Interpol etj, si edhe besimin se kjo mbështetje do të vijojë.

Kryetari i Parlamentit të Arabisë Saudite, Abdullah Al-Sheikh, falenderoi Kryetaren Nikolla për pritjen e ngrohtë dhe nënvizoi se “Arabia Saudite do të vijojë bashkëpunimin me Shqipërinë dhe ky bashkëpunim është shumë më tepër se politik, ekonomik e financiar, është një “përkthim” i miqësisë mes vendeve tona dhe popujve tanë”.

Kryetarja Nikolla dhe Kryetari Al-Sheikh nënvizuan se parlamentet e Shqipërisë dhe të Arabisë Saudite do të vijojnë të nxisin bashkëpunim e gjithanshëm mes dy vendeve.

LEXONI GJITHASHTU:

• Lindita Nikolla në Panairin e Librit: Pjesëmarrje e lartë të rinjsh, lajm i mirë
• Dhuna ndaj grave/ Lindita Nikolla ndan lajmin: Kuvendi do shqyrtojë paketën ligjore