Lindita Nikolla në Panairin e Librit: Pjesëmarrje e lartë të rinjsh, lajm i mirë

Kryetarja e Kuvendit të Shqipërisë, Lindita Nikolla ka vizituar këtë të premte Panairin e Librit në edicionin e 26 të tij. Ajo është shoqëruar në vizitat e saj nëpër stendat e panairit nga kryetari i Shoqatës së botuesve Shqiptarë, Petrit Ymeri.

E pyetur nga gazetarja e Euronews Albania, Enilda Miftari se si i është dukur ky panair. Nikolla tha se sipas botuesve, ky vit ka pasur një organizim më të mirë dhe një pjesëmarrje më të lartë nga lexuesit. Ajo gjithashtu zbuloi blerjet e bëra deri më tani në këtë panair.

“Botuesit flasin vetë, thonë se këtë vit ka pasur një organizim më të mirë dhe pjesëmarrja e lexuesve ka qenë më e lartë se vitet e kaluara. Ky është një lajm i mirë për ne për të gjithë ne, sepse kemi filluar të lexojmë. Të rinjtë e të rejat kanë filluar të lexojnë dhe besoj se kjo traditë e mirë do të reflektohet edhe në të ardhmen.

Me zotin Petrit folëm edhe për disa problematika që botuesit kanë, në mënyrë që tu japim mbështetjen e merituar. Unë në këtë panair, nuk kam bërë zgjedhje personale, u besova botuesve, ata më kanë propozuar titujt që duhet të lexoja dhe u besova”.

Librat që zonja Lindita Nikolla shtoi në bibliotekën e saj në këtë panair ishin: “Endur në tisin e kohës”,  Vedat Kokona; “Takimet e mia me 39 personazhe” nga Blendi Fevziu; “Dollia” nga Sherif Bundo; “Tri jetët e një qyteti” nga Dritan Ergo, “Komploti” nga Ben Blushi dhe librin e profesor Matteo Mandala.

LEXONI GJITHASHTU:

• Begaj në Panairin e Librit: Gjithçka “flet” shqip, falë shkrimtarëve e botuesve
• Basha në Panairin e Librit: Më bëhet zemra mal kur shoh të rinj që lexojnë