Vaksinimi në Venecia, autobusi kthehet në klinikë lundruese për të arritur ishujt

Venecia dhe laguna e saj përfaqësojnë një nga thesaret e Italisë, por kur bëhet fjalë për shpërndarjen e vaksinave anti-COVID tek të moshuarit që jetojnë në ishujt e vegjël, ngrihen shumë probleme logjistike.

Qyteti po merr masa kreative për të çuar vaksinat tek banorët e vështirë për t’u arritur dhe për këtë ka kthyer një lloj autobusi ujor në një qendër vaksinimi lundruese.

Rreth 100 të moshuar që jetojnë në ishullin e vogël Sant Erasmo, në lagunën veneciane, do të marrin këto ditë dozat e vaksinave “Moderna” dhe “AstraZeneca”.

Autoritetet vendore, me kthimin e autobusëve ujorë në klinika shpresojnë të ofrojnë një shërbim të mirë për njerëzit që kanë vështirësi në lëvizje.

Drejtori i Autoritetit Shëndetësor të Venecias, Edgardo Contato tha se të moshuarit mund të shpresojnë për një të ardhme pasi të marrin vaksinën pa qenë nevoja të lënë ishullin.

“Këtu do të vaksinojmë njerëzit që kanë probleme me lëvizjen. Për të ofruar këtë shërbim, rajoni i Venetos pajisi një autobus lundrues që do t’u japë këtyre njerëzve mundësinë të vaksinohen dhe rrjedhimisht të shpresojnë për një të ardhme”, thotë Edgardo Contato, shef i Autoritetit Shëndetësor të Venecias, Itali.

Italia raportoi 326 vdekje të reja nga coronavirusi ditën e diel, që e çuan në 111 mijë e 30 numrin e viktimave që nga rënia e epidemisë në shkurt të vitit të kaluar. Bëhet fjalë për bilancin e dytë më të lartë të vdekjeve në Evropë dhe të shtatin në botë.