Skandali me Ozempik, ilaçin për humbjen në peshë. Farmacistët: Është i falsifikuar

Ozempik, ilaçi magjik i përdorur dhe reklamuar gjerësisht nga influencerat botëror në rrjete sociale për humbjen e peshës, tashmë është kthyer në alarm.

Tundimit për ta përdorur këtë ilaç për të reduktuar kilet e tepërta ,nuk i shpëtuan as shqiptarët. Dhjetra farmaci dhe klinika private estetike nisën ta ofrojnë , por kur trendi arriti kulmin, urdhëri i farmacistëve të Shqipërisë jep alarmin. Ky bar nuk është futur kurrë ligjërisht në Shqipëri dhe çdo penë ozempik e përdorur është e falsifikuar.

“Produktet e falsifikuara janë shitur si brenda zinxhirit tě ligjshëm të furnizimit me barna, ashtu edhe në atë të paligjshëm. Përmbajtja e penave të falsifikuara është krejtësisht e ndryshme nga produktet origjinale dhe nuk duhet të përdoret pasi përbën rrezik për sigurinë e pacientit.  Bari Ozempic është i regjistruar por nuk është importuar asnjëherë nga Zyra e pěrfaqësimit Novo Nordisk A/S në Republikën e Shqipërisë”, njoftoj urdhri i farmacistëve

Më herët edhe Organizata Botërore e Shëndetësisë dha alarmin se pena të falsifikuar të Ozempic u konstatuan në Britani, Brazil, Irlandë dhe ShBA. Ekspertët e shëndetësisë botërore njoftuan se përdorimi i tyre çon deri në rrezik për jetën.

“Përdorimi i OZEMPIC-ut të falsifikuar mund të çojë në trajtim joefektiv të pacientëve për shkak të dozimit të gabuar, kontaminimit me substanca të dëmshme, ose përdorimi i përbërësve të panjohur ose të zëvendësuar. Mund të përbëjë rreziqe serioze për shëndetin për shkak të administrimit të injeksioneve nënlëkurore të cilat mund të jenë kërcënuese për jetën” njofton OBSH.

Ozempic në fakt u prodhua nga kompania Novo Nordisk për të trajtuar pacientët që vuajnë nga diabeti tip 2.  Ai injektohet në lëkurë, 1 herë në javë dhe jep efektin e ngopjes duke frenuar oreksin.  Por ky  ilaç i  brezit të ri jep efekte negative kur përdoret për një kohë të gjatë dhe pa rekomandimin e mjekut. Ka të dhëna se  ai shkakton tumore të gjendjes tiroide dhe dyshohet që mund të japë kancer në nivele të ndryshme të organizmit. Dhe nuk janë vetëm këto dëmet, pasi edhe lista e efekteve negative të mundshme është e gjatë dhe prek të gjitha organet e trupit nga pankreasi deri tek tëmthi.

LEXO GJITHASHTU:

• Studim| Ilaçi për humbjen drastike të peshës dhe diabetin, Ozempic shkakton verbërim
• Mjeku jep alarmin: Dietologët në Shqipëri po japin ilaçin Ozempic për dobësim