Starton MIK Festival| Dy koncerte në korçë, Radoja dhe Ahmeti ndezin atmosferën

Ka filluar mbrëmë me dy koncerte në Korçë edicioni i 7 i festivalit internacional të muzikës, MIK Festival.

Për të 7-të vit ky festival organizohet në Korçë nga sopranoja e njohur Inva Mula, ndërsa pjesëmarrës janë artistë nga vende të ndryshme të botës.

Koncerti i parë ka qenë ai i pianistit Red Radoja i cili jeton dhe punon si pedagog i pianos në Francë.

Radoja me lojën e tij në piano ka tërhequr vëmendjen e artdashësve të shumtë në skenën e teatrit “Andon Zako Çajupi” në Korçë, ndërsa koncerti i dytë i natës së parë të MIK FESTIVAL ka qenë ai i sopranos shqiptare Dëshira Ahmeti, soliste në operan nacionale të Maqedonisë së Veriut.

“Ne sot erdhëm me mesazh nga bashkëjetesa shqiptëro – maqedonase, ku bashkëjetojmë, unë jam soliste në Maqedoninë e Veriut, soliste e parë shqiptare dhe nuk ka patur para meje, vazhdoj të jem dhe me vjen e keq. Puna ime, misioni im është të prezantoj shqiptaren në teatër, e ti sjell në Shqipërine e bukur, të japin përveç muzikës, mesazhe të ndryshme”, tha sopranoja Dëshira Ahmeti.

Diva e muzikës  Inva Mula ia ka dalë që edhe në këtë edicion të sjellë solistë e instrumentistë të njohur shqiptarë e të huaj.

“Këto 7 vite kanë kaluar shumë shpejt. Do ishte një buqetë kaq e bukur me muzikë, me shumëllojshmëri stilesh, më artistë, me kombësi, me gjuhë të ndryshme. Një buqetë i cila i ofrohet publikut të Korçës dhe mua më jep sadisfaksion, ndihem e privilegjuar. Ka qenë e lehtë, të gjithë nuk thonë JO”, tha Inva Mula.

MIK Festival pas operetës Agimi do të udhëtoje drejt Drenovës së Asdrenit me “Inva Mula and friends” dhe në Voskopojë ku në Kishën e Shën Kollit do të jetë koncerti i fundit.

LEXONI GJITHASHTU:

• Festivali “mirëdita, dobar dan”, Serbia e ndalon: Mund të rrezikojë sigurinë
• Festivali ballkanik i filmit në Pogradec, për 4 netë do të shfaqen filma të ndryshëm