Nga burgu në PE, Beleri nga Rinasi: Herët a vonë dëshira e sovranit respektohet

Kryebashkiaku i zgjedhur i Himarës, Fredi Beleri, ka lënë ambientet e burgut, për të shkuar në Strasburg për t’u betuar si eurodeputet në Parlamentin Europian.

Gjatë fjalës së tij në aeroportin e Rinasit, Beleri tha se fillimisht do të shkojë në Athinë, e më pas në Strasburg, ku do të marrë pjesë në mbledhjen e PE.

Beleri tha se drejtësia ka vepruar me 2 standarte ndaj tij, teksa shtoi se një ditë dëshira e sovranit do të respektohet.

Ai shtoi se vendimin për dënimin e tij me 2 vite burg për blerje votash do e ankimojë në të gjitha hallkat e drejtësisë shqiptare dhe nëse nuk gjen zgjidhje, edhe në Strasburg.

“Dua të falënderoj Drejtorinë e Burgjeve që mori këtë vendim. Natyrshëm lind pyetja pse kjo gjë nuk u bë për marrjen e mandatit të Bashkisë së Himarës. Po iki drejt Athinës, nesër do të jem në Strasburg për të marrë pjesë në mbledhjen e parë të Parlamentit.

Nesër atje ka votime e vendime të rëndësishme. Që në fillim të kësaj çështjeje ka pasur 2 standarte, që vijojnë akoma nga ana e drejtësisë.

Herët a vonë dëshira e sovranit respektohet. Në 4 gusht mendoj se himariotët do i japin një përgjigje. Vendimin për dënimin do e ankimoj në të gjitha hallkat e drejtësisë shqiptare dhe nëse nuk gjej drejtësi, edhe në Strasburg”, tha Beleri.

LEXONI GJITHASHTU:

• Beleri kërkon 5 ditë lejë për të kryer betimin në PE: Kam kryer 5/6 e dënimit
• Mediat greke: Beleri ka marrë leje të betohet si eurodeputet në Strasburg