U plagosën 2 vëllezër, Policia zbulon shkaqet e shpërthimit në makinën në Gramsh

Të tjera detaje kanë dalë lidhur me shpërthimin gjatë ditës së djeshme në një automjet në Gramsh.

Përmes një njoftimi Policia bën të ditur se si pasojë e shpërthimit mbetën të plagosur dy vëllezërit që udhëtonin me këtë mjet.

Pas ekzaminimeve nga forcat RENEA, ka rezultuar se shpërthimi nuk ka pasur të bëjë me vendosjen e lëndëve eksplozive nga jashtë, por pa pasur një lëndë plasëse me efekt të ulët në kroskotin e makinës, e cila nga nxehtësia ka shpërthyer.

Ndërkohë vijojnë hetimet për zbardhjen e plotë dhe dokumentimin e ngjarjes në fjalë.

Njoftimi i Policisë:

Gramsh/Informacion shtesë

Në lidhje me informacionin e dhënë  për një shpërthim të ndodhur në lagjen “Xhile Liçi”, Gramsh, në automjetin tip “Ford Focus”, që drejtohej nga shtetasi A. M., gjatë kohës që automjeti ka qenë në lëvizje dhe për pasojë mbetën të dëmtuar dy vëllezërit që udhëtonin në këtë automjet, ju informojmë se:

Për sqarimin dhe dokumentimin e këtij rasti u ngrit një grup i posaçëm hetimor dhe në vendngjarje shkoi edhe njësia antieksploziv e Repartit Special Renea, për të kryer ekzaminime të mekanizmit e rrethaneve qe kishin ndikuar në shpërthimin e ndodhur në automjet.

Në përfundim të veprimeve të para, rezultoi se nuk ka pasur shpërthim nga jashtë të automjetit (pra nuk kemi të bëjmë me lëndë eksplozive) por dyshohet se drejtuesi i automjetit ka pasur në kroskotin e automjetit lëndë plasëse të dyshuar Amonit Malor, me fuqi të ulët veprimi, lëndë e cila dyshohet se ka shpërthyer për shkak të nxehtësisë.

Nga tërësia e veprimeve të kryera rezulton se kemi të bëjmë me një ngjarje aksidentale dhe nuk ka asnjë indicje për veprim kriminal ndaj të dëmtuarëve.

Grupi hetimor nën drejtimin e Prokurorisë vijon punën për sqarimin e dokumentimin e plotë ligjor të këtij rasti.

LEXONI GJITHASHTU:

• VIDEO| Shpërthim në një nga shtyllat e tensionit të lartë në Sarandë
• EMRI| Shpërthim me tritol në banesën e oficerit të policisë në Shkodër