Euronews siguron foton e makinës së atentatorëve, momenti para masakrës në Memaliaj

Euronews Albania ka arritur të sigurojë pamje të makinës e të cilën lëvizinin autorët e masakrës me tre viktima në Memaliaj. Makina është kapur nga kamerat e sigurisë gjatë lëvizjes pak para se të kryhej atentati.

Ngjarja e rëndë ku mbetën të vrarë tre persona ndërsa një tjetër u plagos rëndë ndodhi mbrëmjen e të shtunës, rreth orës 23:00.

Shënjestër e atentatit ka qenë Shyqyri Kalemi, babai i Andrea Kalemit, i cili nuk i mbijetoi dot plumbave.

I plagosur ka mbetur Artur Kalemi, xhaxhai i Andrea Kalemit. Viktima, Shyqyri Kalemi, është babai i Adriatik dhe Zamir Kalemit, të afërm të Aleksandër Sadikajt të vrarë me eksploziv në Tiranë në korrik 2022.

Po ashtu, viktima kanë mbetur kamerieri 36-vjeçar, Gledio Muka dhe klienti 47-vjeçar, Marsel Çela, dy viktima të pafajshme të cilët kanë qenë në lokal në momentin e ngjarjes.

Dyshohet se autorët kanë qenë të paktën 3 persona, të cilët kanë ardhur me makinë të zezë nga qyteti i Memaliajt në drejtim të lokalit. Një prej tyre ka zbritur nga mjeti dhe ka qëlluar me breshëri në drejtim të Shyqyri Kalemit, i cili ishte ulur në një tavolinë jashtë lokalit.

Plumbat kapën dhe vëllanë e tij, si edhe kamarierin Gledian Muka që ishte pranë tavolinës. Ndërkohë, klienti, Marsel Çela që mbeti i vdekur, ka qenë brenda në lokal.

Pas atentatit, autorët janë larguar në drejtim të Mallakastrës, ku në fshatin Bejaj kanë djegur makinën me të cilën kryen atentatin.

LEXONI GJITHASHTU:

• Flet gjyshja e kamarierit në Memaliaj: Punonte për bukën e gojës, pse e vranë djalin
• Masakra në Memaliaj| Eksperti: Autorët mund të jenë arratisur drejt tokës greke