28 vite dedikuar kostumeve popullore të Dumresë, 68-vjeçarja ruan ende traditën

Të ruash traditën është shumë më tepër se të qepësh një veshje. Është përkushtimi për të sjellë origjinalen, respekti për detajin, mirënjohja për trashëgiminë dhe puna e pakursyer.

Kështu e konsideron punën e saj Xhemile Bullari, një ndër zonjat që punon kostumet popullore të Dumresë në zonën e Belshit.

68 vjeçarja thotë se pasioni është promotori kryesor që mund të bësh këtë zanat, i cili si çdo zanat, ka vështirësitë, por edhe kënaqësitë e veta.

” Unë kam 28 vite që i bëj. Nga nëna ime e mësova se i rrija aty dhe i jepja fije dhe ja kuptoja pak. Duan shumë punë, se një javë duan vetëm një copë me e bëre. Pjesa me e vështirë janë punimet me lule. Kanë mundim por është punë tërheqëse. “-tha ajo.

Zonja Xhemile, e ka parë këtë zanat jo vetëm fitimprurës, por edhe si mundësi për të bërë një jetë me pasion.

” Ka shumë procese pune, ka mbi 10-12 procese pune që ta mbarosh. Kërkohen edhe nga të huajt por unë nuk dal shumë, kam vajt  deri ne Berat mua atje mi kanë marrë.”-tregon zonja nga Elbasani.

Kostumet popullore të Dumresë, me elemente autentike dhe entografike pëlqehen shumë edhe nga emigrantë shqiptarë,   të cilët edhe nëse nuk blejnë, të paktën do ta marrin me qira për pak kohë.

LEXONI GJITHASHTU:

• U18, Kampionati Europian i Basketbollit për herë të parë në Elbasan
• “Amanet mos t’i shesin”- Gruaja që ka veshje popullore shqiptare 200-vjeçare