Voskopoja ndjek traditën, gratë nisin përgatitjet për zahiret

Zonjat duararta voskopojare kanë nisur përgatitjen e zahireve të dimrit, ushqime tradicionale këto të pëlqyera edhe nga vetë turistët e huaj.

Lirika Sadiku dhe Jorgjia Zguri që në vegjëli kanë mësuar të përgatisin zahiretë, ku ende dhe sot duart e tyre nuk lodhen.

“Petkat bëjmë, i kemi për dimër. I bëjmë në behar. Unë kam që 15 vjeç që më ka mësuar mamaja, tani ua kam lënë traditë fëmijëve. I bëj vetëm për vete, për çupat, për mbesat, të gjitha gratë e bëjnë, ka edhe të reja që e bëjnë, trashëgimi është.” –tregon Jorgjia.

Zahiretë janë të llojeve të ndryshme e përveç banorëve dhe restoranteve të zonës, klientët e përhershëm ngelën të huajt.

” Janë zahiretë e dimrit, petkat, jufka, trahana, të ëmbël, të tharte, komposto, oshafe. Reçelëra. Jo vetëm gratë po e burrat I hapin petët.” –tha Lirika.

Por a duan sot vajzat e reja të bëjnë duart me miell?

” Jo se e kanë harruar po ato me studime, pushime, plazhet, rinia e sotme. Për të ngrënë duan, për të munduar duart nuk e kanë me qejf. Megjithatë them kur te rriten në moshë.”  -përgjigjet Lirika.

Gatimet tradicionale të zonës së Voskopojës por edhe atyre të Dardhës e Boboshticës janë të pëlqyera nga turistët vendas e të huaj.