Mblidhet Këshilli i Legjislacionit për mandatin e Xhaçkës, PD paraqet raportin

Këshilli i Legjislacionit te Kuvendit ka nisur këtë të martë mbledhjen e planifikuar jashtë sesionit parlamentar për të shqyrtuar mandatin e deputetes Olta Xhaçka.

“Mandati i Olta Xhaçkës”, Kuvendi mblidhet në seancë të jashtëzakonshme, Këshilli i Legjislacionit shqyrton vendimin e Gjykatës Kushtetuese.

Kryetarja e Këshillit të Legjislacionit Dhurata Çupi paraqiti në nisje të seancës raportin e Partisë Demokratike, ku nënëvizoi detyrimin e Kuvendit të votojë dërgimin e mocionit për Xhaçkën në Kushtetuese.

Çupi theksoi se Kuvendi nuk ka hapësirë për interpretimin e normave kushtetuese, ndaj duhet të votojë pro mocionin për papajtueshmërinë e mandatit të deputetes Ola Xhaçka dhe dërgimin e çështjes në Kushtetuese.

“Kuvendi ka detyrimin që të votojë për dërgimin e këtij mocioni në Gjykatën Kushtetuese, si mënyra e vetme për zbatimin e vendimit të Gjykatës Kushtetuese dhe mënyra e vetme e zgjidhjes së këtij konflikti kompetencash.

Kryetarja e Kuvendit duhet të informojë Kuvendin se duhet të vendosë dërgimin në Gjykatën Kushtetuese të mocionit për papajtueshmërinë e mandatit të deputetes Olta Xhaçka, pa vonesa, për t’i hapur rrugë ushtrimit nga Gjykata të kompetencave të saj kushtetuese.

Kuvendi nuk ka hapësirë për interpretimin e normave kushtetuese, pasi nuk është në pozitat e interpretuesit të parë dhe origjinal të tyre, për sa kohë që për çështjen konkrete është shprehur Gjykata Kushtetuese, e cila në vendimmarrjen e saj ka konstatuar se mocioni i jo më pak se 1/10-ës së deputetëve plotëson kriteret juridiko-formale për vënien e saj në lëvizje nga Kuvendi, ndaj ky i fundit nuk ka pasur hapësirë për të vlerësuar sërish ato”, tha Çupi.

Vendimi për mbledhjen e Këshillit të Legjislacionit u mor nga kryetarja e parlamentit Elisa Spiropali pas kërkesave të opozitës. Konkretisht, keshilli do të shqyrtojë vendimin e Gjykatës Kushtetuese që e urdhëroi Kuvendin t’i dërgojë asaj mandatin e Olta Xhaçkës për të vendosur nëse është në konflikt interesi apo jo.

Çështja “Xhaçka” është dërguar në Gjykatën Kushtetuese nga opozita e cila pretendon se deputetes socialiste duhet t’i hiqet mandati me argumentin e konfliktit të interesit, për shkak të statusit të investitorit që ka bashkëshorti i saj.

LEXONI GJITHASHTU:

• Mandati i Xhaçkës, PD-Spiropalit: Shkelët Kushtetutën, mblidhni parlamentin
• Mandati i Xhaçkës, Kuvendi vendos të mbledhë Këshillin në seancë të jashtëzakonshme