Çelet ekspozita e foto-arkivit në Gjirokastër, shfaqen 80 objekte kulti të vendit

Kalaja e gurtë e Gjirokastrës krahas vizitave të shumta nga turistët e shumtë është kthyer edhe në një qendër të veçantë të organizimit të aktiviteteve kulturore.

Në fundjavë në mjediset e kështjellës së Argjiros u çel një ekspozitë fotografike përgjatë së cilës prezantoheshin monumentet e kulturës në vite.

Në rreth 80 foto-arkiv u prezantuan disa prej monumenteve dhe objekteve kryesore të trashëgimisë kulturore në vendin tonë.

“Ekspozita që ne po organizojmë është në kuadër të 80-vjetorit të Çlirimit të vendit, janë bërë disa ekspozita përgjatë këtij viti, kjo është e treat që ne organizojmë dhe ekspozita prezanton monumentet e kulturës,punën që është bëra nga Instituti i Trashëgimisë Kulturore ndër vite që në themelimin e tij dhe deri tani,” –shprehet Kejda Almche, specialiste e Institutit Kombëtar të Trashëgimisë Kulturore.

Çelja e kësaj ekspozite në mjediset e kalasë së Gjirokastrës, që është monumenti më i vizituar në vendin tonë tërhoqi edhe vëmendjen dhe interesimin e turistëve të shumtë.

“Është me vlera të mëdha që ne të promovojmë trashëgiminë tonë kulturore dhe njëkohësisht të tregojmë vendasve dhe turistëve në lidhje me arkeologjinë, trashëgiminë kulturore dhe monumentet e tjera të cilat kanë vlera, ne kemi ekspozuar një pjesë të arkivit tonë për të treguar ndryshimet që ka pësuar monumenti dhe restaurimet që Janë bërë gjatë kohëve në vijim që nga themelimi i institutit tonë,” –thotë Andrea Pambuku, një tjetër specialist i këtij Instituti.

Përgjatë sezonit të verës në Gjirokastër u zhvilluan aktivitete të shumta kulturore dhe artistike ndërsa kalendari i pasur i organizimeve do të vazhdojë edhe në stinën e vjeshtës.

LEXONI GJITHASHTU:

• Vjeshta turistike në Gjirokastër, rezervimet shkojnë në masën 60%
• Vjeshta turistike në Gjirokastër, rriten kërkesat për akomodime