Në këtë fillim shtatori qyteti i Gjirokastrës dhe rrethinat vazhdojnë të mirëpresin një numër të lartë turistësh vendas dhe të huaj.

Përfaqësuesit e bizneseve turistike shprehen se rreth 60% e turistëve vijnë me grupe të organizuara ndërsa pjesa tjetër udhëtojnë si familje apo individë.

Turistët kryesisht të huaj në këtë periudhë preferojnë të vizitojnë monumentet e kulturës si dhe vlerat historike dhe arkitektonike të qytetit të gurtë.

“Muaji shtator dhe tetor është pjesë e kulmit të sezonit turistik për Gjirokastrën sepse dihet që këto janë muajt e sezonit të turizmit kulturor dhe Gjirokastra është një nga destinacionet kryesore,numri i vizitorëve ka qenë shumë i lartë në këto ditë,të gjithë jemi dëshmimtarë keni parë rrugët e pazarit plot, të gjitha strukturat akomoduese në pjesën më të madhe janë të rezervuara sepse janë grupet e turizmit kulturor,” –tregon kryetari i Dhomës së Tregtisë Maksim Hoxha.

“Muaji shtator ka filluar mirë ne pothuajse kemi patur rezervime nga grupet në masën 60% dhe tani 20% ka edhe fluks turistësh që janë individë,”-tha administratori i biznesit turistik Hysen Kodra.

Trendi i lartë i vizitueshëmrisë turistike pritet të vazhdojë edhe gjatë vjeshtës.

Tashmë rreth 80% e kapaciteteve akomoduese janë të ezauruara për muajt shtator dhe tetor duke e bërë qytetin e Gjirokastrës dhe rrethinat të përzgjurën e turizmit edhe në nivel kombëtar.

“Kjo ecuri e shtatorit është edhe për muajin tetor deri në javën e parë të nëntorit , shpresojmë që të ketë vazhdimësi edhe pas javës së parë të nëntorit, gjithsesi deri në këtë periduhë që po flasim Gjirokastra në 70-80% është e mbyllur përsa i përket prenotimeve,” -u shpreh kryetari i Dhomës së Tregtisë Maksim Hoxha.

Përgjatë periudhës së verës Gjirokastra u vizitua nga një numër i lartë turistësh, duke ndikuar pozitivisht për zhvillimin e ekonomisë lokale dhe çeljen e vendeve të punës.

LEXONI GHITHASHTU:

• Vjeshta turistike në Gjirokastër, rriten kërkesat për akomodime
• Turizmi në Malësinë e Madhe, të huajt kryesojnë listën