“Pronat”, Mitsotakis paralajmëron Shqipërinë

Kryeministri i Greqisë Kyriakos Mitsotakis u pyet për marrëdhëniet greko-shqiptare pas hapjes së Panairit të 88-të Ndërkombëtar të Selanikut.

Pas lirimit të Fredi Belerit nga burgu, Greqia i ka vënë Shqipërisë një tjetër kusht që të mos pengojë rrugën e anëtarësimit në BE. Bëhet fjalë për çështjen e pronave.

Për gazetarët, Mitsotakis tha se dëshiron të ketë marrëdhënie të mira me Shqipërinë, por e vuri theksin te çështja e pronave. Ai u shpreh se respektimi i të drejtave të pronësisë do të jetë kusht për integrimin e Shqipërisë në BE.

“Marrëdhëniet midis Greqisë dhe Shqipërisë, që ne duam të jenë shumë të mira, kalojnë nga respektimi i të drejtave të pakicës kombëtare greke të Shqipërisë. Çështja e të drejtave pronësore nuk ka dalë asnjëherë nga agjenda jonë.

Ajo po rikthehet dhe ajo që ne do të bëjmë është të sigurojmë, me ndihmën edhe të Fredi Belerit në Parlamentin Europian, që të drejtat pronësore të bashkatdhetarëve tanë në Shqipëri të respektohen plotësisht. Dhe do të thoja se ky është një kusht i domosdoshëm që Shqipëria të vazhdojë të ecë në rrugën e saj europiane”, tha Mitsotakis.

I pyetur për raportet me kryeministrin Rama, kryeministri Grek tha: “Ne duam marrëdhëniet më të mira të mundshme me të gjithë fqinjët tanë dhe mes këtyre fqinjëve është edhe Shqipëria”.

LEXONI GJITHASHTU:

• Greqia plan për rritjen e pagave dhe pensioneve, çfarë parashikohet
• Zëdhënësi i qeverisë: Greqia po përballet me 50 % më shumë zjarre se vitin e kaluar