Policia e Shtetit shton kontrollet, dërgon për verifikim 140 makina luksoze

Paralelisht më Operacion Forca e Ligjit , prej 4 ditësh Policia ka nisur një fushatë për kontrollin e territorit me fokus automjetet luksoze. Postblloqe të shumta janë ngritur në akset kryesore nacionale, por edhe zona që frekuentohen nga elementët kriminalë.

Me grupet e lëvizshme, në terren kanë zbritur edhe forcat e ndërhyrjes së shpejtë ndërsa krahas kontrolleve për drogë dhe armë po verifikohet edhe dokumentacioni i automjeteve luksoze dhe personat që i posedojnë ose mbajnë në përdorim.

Sipas policisë mbi 140 automjete në të gjithë vendin janë bllokuar me qëllim verifikimin nga sektori i trafiqeve pasi ka dyshime se janë të vjedhura në vendet e Bashkimit Europian. Gjithashtu janë shoqëruar dhe verifikuar në ambientet e Policisë mbi 170 persona.

Ndërkohë një ditë më parë drejtori i përgjithshëm i Policisë së Shtetit,  Ardi Veliu urdhëroi sekuestrimin në kushtet e emergjencës të automjeteve të blinduara të Saimir Taullaut, Durim Bamit, Dashamir Gjokës, dhe Pëllumb Muarremit, personazhe të njohur të botës së krimit.

Një javë pas fillimit të punës, Operacioni Forca e Ligjit u ka dërguar kërkesë me shkrim për të justifikuar pasurinë e tyre 9 shtetasve, mes tyre personazhe të njohur si Lulzim Berisha, Ardian Çapja, Plarent Dervishajt, Suel Çeles dhe Dashamir Gjokës. Këtij të fundit, forcat e policisë i kanë sekuestruar dhe një makinë të blinduar në operacionin e ditës së shtunë, ku gjithsej u sekuestruan 3 të tilla.

Operacioni Forca e Ligjit është kundërshtuar nga opozita shqiptare. Ajo thekson se ky akt normativ bie ndesh me Kushtetutën e vendit, por edhe me parimet themelore të Konventës së të Drejtave të Njeriut.

Bashkimi Europian dhe Shtetet e Bashkuara të Amerikës kanë përgëzuar nismën e qeverisë shqiptare, ndërsa janë shprehur se do ta mbajnë nën monitorim zbatimin e këtij operacioni, i cili do të detyrojë subjektet e dyshuara të plotësojnë një formular për të justifikuar burimin e të ardhurave të tyre. Në fokus të punës së aktit normativ janë emra të njohur për Policinë dhe drejtësinë shqiptare.