Asociacioni ‘mollë sherri’ në Kosovë, kryeparlamentari kundër BE

Qasjen e Bashkimit Evropian ndaj Kosovës, konkretisht për çështjen e asociacionit të komunave serbe, kreu i Parlamentit, Glauk Konjufca, e quajti diskriminuese.

Ai ishte i ashpër me mënyrën se si BE, sipas tij, pretendon t’ia marrë Kosovës një të drejtë kushtetuese, për shkak të vonesës.

Për më tepër, Konjufca tha se draft-statuti i Asociacionit, i propozuar dhe hartuar nga BE, është i papranueshëm, pasi ai duhet të hartohet nga vetë institucionet e Kosovës.

Por, ishin opozitaret ata që i rikujtuan kryeparlamentarit se nuk i kishin këto qëndrime kur ky draft u soll në Prishtinë nga BE-ja.

Ndërsa, LDK i kujtoi këshillat që i kishte dhënë që në fillim në mënyrë që vendi të mos vijë në këtë pozicion që ndodhet tani.

Të gjitha këto u thanë pas mbledhjes së kryesisë së Kuvendit, kur u pyeten rreth asaj që pritet të kërkohet nga raporti i progresit të BE-së për këtë vit, i cili kërkesë kryesore për Prishtinën dhe Beogradin, ka zbatimin urgjent të marrëveshjeve të arritura, përfshi edhe asociacionin.