Rriten rastet me fruth, OBSH: Në 2023 u regjistruan 20% më shumë infektime 

Rastet e fruthit në botë arritën në 10.3 milionë gjatë vitit 2023, duke shënuar një rritje shqetësuese me 20% krahasuar me vitin 2022, sipas të dhënave nga Organizata Botërore e Shëndetësisë dhe Qendrës Amerikane për Kontrollin dhe Parandalimin e Sëmundjeve, kjo rritje e rasteve ka ardhur si pasojë e mbulimit të pamjaftueshëm të vaksinimit, duke vënë në rrezik miliona jetë njerëzish.

Pavarësisht se fruthi është i parandalueshëm me dy doza të vaksinës, mbi 22 milionë fëmijë humbën dozën e parë të vaksinës në 2023. Vetëm 83% e fëmijëve morën dozën e parë, ndërsa mbulimi me dozën e dytë ishte edhe më i ulët, në 74%. Sipas OBSH-së, për të parandaluar shpërthime të reja, është thelbësore që çdo vend të arrijë një mbulim prej 95% për të dyja dozat.

Në vitin 2023, 57 vende raportuan shpërthime të mëdha të fruthit, një rritje prej 60% krahasuar me vitin 2022. Pothuajse gjysma e këtyre shpërthimeve ndodhën në Afrikë por rritje të rasteve raportoi edhe Evropa dhe Azia Juglindore.

Ekspertët paralajmërojnë se fruthi vazhdon të jetë një kërcënim serioz, veçanërisht për fëmijët nën moshën 5 vjeç, që përbëjnë shumicën e 107,500 vdekjeve të raportuara në 2023. Ndërsa numri i vdekjeve ra me 8% krahasuar me vitin 2022, fruthi mbetet një sëmundje me pasoja të rënda, duke përfshirë verbëri, pneumoni dhe encefalit.

LEXONI GJITHASHTU:

• 33% e adoleshentëve pa mbështetje, OBSH: presioni nga ngarkesa në shkollë rritet
• OBSH: Identifikohen 2 rastet e para, të infektuara me mpox në Angli