PS dhe PD bien dakord për ndryshimet në Kodin Zgjedhor: Do e bëjmë për diasporën

Pak ditë më parë kreu i KQZ Ilirjan Celibashi shprehu shqetësimin se vota e diasporës mund të jetë drejt dështimit. Për këtë u diskutua këtë të mërkurë në “Barometri” në Euronews Albania ku përballë njëri-tjetrit dhe gazetarëve ishin sekretari për çështjet zgjedhore në Partinë Socialiste, Damian Gjiknuri dhe sekretari për çështjet zgjedhore në Partinë Demokratike, Ivi Kaso.

Celibashi është shprehur se duhen ndryshuar afatet e regjistrimit të subjekteve ligjore dhe për herë të parë PD dhe PS duket se do të bien dakord edhe për këtë çështje. Ivi Kaso tha se do të ishin të gatshëm të bënin ndryshime në Kodin Zgjedhor nëse kjo është zgjidhja e fundit që garanton procesin.

“Ne e kemi thënë nëpërmjet kryetarit të partisë që nëse zgjidhja ligjore do të ishte zgjidhja e fundit dhe e përshtatshme që garantonte procesin, ne sigurisht që nuk do ta lëmë këtë proces të dështojë për aspekte teknike”,-tha Ivi Kaso.

Nga ana tjetër Gjiknuri tha se edhe më herët janë bërë konsultime se si do të funksiononte vota e emigrantëve dhe KQZ nuk i ka ngritur këto shqetësime, por siç u shpreh ai qeveria është e gatshme për të bërë votën e emigrantëve të mundur.

“Ne mendojmë se me një shtyrje disa ditore për të afruar afatin e regjistrimit të kandidatëve është zgjidhja më praktike e mundshme”,-u shpreh Gjiknuri.

LEXONI GJITHASHTU:

• “Vota e emigrantëve në rrezik”, Gjiknuri: Duhet zgjidhje ligjore
• “A mund të manipulohet vota e diasporës?” Eksperti Kume: Ja si zgjidhet çështja