A do dështojë vota e diasporës? Gazetari: Nuk çuditem, është bërë një “mur vonesash”

Gazetari Ardit Hoxha tha këtë të mërkurë në “Barometri” në Euronews Albania se nuk do të çuditej nëse edhe këtë herë vota e emigrantëve do të dështonte.

Sipas tij kanë ndodhur një sërë vonesash ligjore të cilat e bëjnë disi më të pamundur realizimin e votimit nga shqiptarët e diasporës, të cilat i renditi më poshtë:

“Unë nuk do habitesha fare nëse do dështonte sërish vota e diasporës. Ka disa elementë të cilët unë i shikoj disi të çuditshme. Pse vendoset dhe bëhen ndryshime në kodin zgjedhor vetëm 9-10 muaj para datës së zgjedhjeve?

Pse nga korriku deri në tetor kur filloi të mblidhej komisioni rregullator kaluan tre muaj të tjerë dhe në atë kohë filloi mekanizmi i KQZ të punojë për këtë çështje? Pyetja e tretë: Pse Presidenti i shkon afër afatit final për të përcaktuar një datë zgjedhjesh?

Ne kemi shembullin e 25 prillit 2021 ku atë kohë presidenti Meta e dekretonte datën e zgjedhjeve afro 7 muaj më parë dhe në edhe në moment të fundit kemi rrezikuar dhe vinin njoftime që  akoma nuk dihej si do ishte fleta e votimit.

Unë mendoj se të gjithë institucionet duke nisur nga Parlamenti, Presidenti, Komisioni Qendror i Zgjedhjeve kanë vënë nga një gur në këtë mur, “muri i vonesave”. Pse duhet të besoj unë se një gjë që dështoi në 2021 kur kishte më shumë kohë nuk do dështojë sërish”,-tha Hoxha.

LEXONI GJITHASHTU:

• “Vota e emigrantëve” Kaso: KQZ të zgjidhë problemin me postat, ne e suportojmë
• PS dhe PD bien dakord për ndryshimet në Kodin Zgjedhor: Do e bëjmë për diasporën