Atmosferë festive në Gjirokastër, aktivitete për festat e Nëntorit

112-vjetori i Shpalljes së Pavarësisë dhe 80-vjetori i Çlirimit të Atdheut janë pritur me atmosferë festive në Gjirokastër përmes aktiviteteve të shumta kulturore dhe artistike.

Përgjatë tyre janë prezantuar vlerat kombëtare si dhe përpjekjet e patriotëve për Pavarësinë dhe Çlirimin e vendit.

Këtë 28 Nëntor në Memorialin e Rilindësve në hyrje të qytetit të gurtë përfaqësues të institucioneve publike vendosën kurora me lule. Pjesëmarrësit përkujtuan kontributin e atdhetarëve gjirokastritë në Shpalljen e Pavarësisë.

“U deshën shumë përpjekje, mund, gjak për t’u mbledhur bashkë gjithë burrat, gjithë patriotët shqiptarë me në krye Ismail Qemalin 112 vite më parë dhe për ti shpallur Pavarësinë e Shqipërisë, krenar për ata patriotë, për ata patriotë gjirokastritë që sot Shqipëria është e pavarur, është krenare dhe po ecën drejt Bashkimit Europian”, tha Flamur Golemi, kryetar i Bashkisë Gjirokastër.

Aktivitete në kuadër të Festave të Nëntorit janë zhvilluar edhe në Tepelenë dhe në Përmet.