Leverkuseni një “ters” për Bayernin, dy skuadrat përballen në mbrëmje

Fitorja e fundit ndaj Leverkusenit daton dy vjet më parë, dhe që prej shtatorit të vitit 2022, Bajerni i Mynihut nuk ka arritur ta mposht këtë kundërshtar, diçka të cilën do të provojnë ta bëjnë këtë të martë.

Mbrëmjen e sotme, dy skuadrat më në formë të kampionatit gjerman përballen me njëra-tjetrën, por këtë herë në Kupë, me një ndeshje teke, ku vetëm njëra ka shansin të kalojë më tej. Një sfidë që vlerësohet maksimalisht, duke kaluar edhe prestigjin e “Der Klassiker” në edicionet e fundit të Bundesligës.

Bavarezët e udhëhequr nga Vincent Kompany, pavarësisht rezultateve jo shumë bindëse, janë favoritë në letër, por kundërshtari nuk duhet nënvlerësuar. Përballja e pak kohëve më parë e luajtur në kampionat u mbyll në barazim 1-1.

Mungesat mbeten një shqetësim për Bayernin, ku bomberi Harry Kane nuk do të luajë për shkak të dëmtimit, dhe së bashku me të, mungojnë edhe Gnabry, Stanisic, Pavlovic, Palhinha dhe Ito. Në kampin e aspirinave, tekniku Alonso nuk ka në dispozicion sulmuesin Boniface, Hofmann, Terrier dhe Adli. Në pesë përballjet e fundit në të gjitha garat, Bajerni numëron 4 fitore dhe 1 barazim, ndërsa Leverkuseni 3 fitore, 1 barazim dhe 1 humbje.