Cenimi i gjuhës shqipe në RMV, Veliaj takon Ali Ahmetin: Po ndjekim me shqetësim

Tirana po ndjek me shqetësim lëvizjet e fundit politike në Maqedoninë e Veriut, e cila kërkon të shfuqizojë ligjin për përdorimin e gjuhës shqipe. Mesazhi i është përcjellë kreut të BDI-së, Ali Ahmeti nga kryebashkiaku, Erion Veliaj.

Kryebashkiaku i Tiranës, Erion Veliaj, priti në një takim kreun e Partisë së Bashkimit Demokratik për Integrim, Ali Ahmeti. Veliaj e vlerësoi Ahmetin për rolin që ka luajtur në mbrojtjen e identitetit të shqiptarëve, dhe shprehu shqetësimin për cenimin që po bëhet gjuhës shqipe në Maqedoninë e Veriut.

“…Jemi shumë të shqetësuar kur ka nisma për të mohuar të drejta tashmë të fituara, për të mohuar të drejta, siç është gjuha shqipe, që e kanë bërë Maqedoninë e Veriut më të mirë, më perëndimore, më evropiane. Po ndjekim me shqetësim gjithë vendimmarrjen e këtyre ditëve”, tha Veliaj.

Ahmeti shprehu angazhimin e tij për ruajtjen e marrëveshjes së Ohrit dhe të drejtat e shqiptarëve, dhe falënderoi Veliajn për mbështetjen e  paqes në rajon.

“Çdo ndryshim apo cenim i marrëveshjes së Ohrit, i ligjit të gjuhës shqipe, që është nga shtyllat kryesore të marrëveshjes paqësore për Ohrin, do të thotë që dëmton marrëdhëniet ndër etnike”, u shpreh Ahmeti

Në shenjë mirënjohje dhe vlerësimi kryebashkiaku Veliaj e nderoi Ahmetin me “Kullën e Sahatit”.

LEXONI GJITHASHTU:

• Gjuha shqipe në RMV, Rama: Materie e dy popujve, s’është për Gjykatë Kushtetuese
• DASH fut në listën e zezë ish-zv.kryeministrin shqiptar në RMV Artan Grubi