Trajneri i Vllaznisë, Brdaric analizon Laçin: Ekip që po bën mirë, duam 3 pikët

Superliga shqiptare rikthehet të shtunën me 3 përballje në kuadër të javës së 18-të duke nisur me duelin e Loro Boricit, mes Vllaznisë dhe Lacit. Dy ekipe të cilat kanë treguar luhatje në formën e tyre, por që objektiv të vetëm kanë 3 pikët.

Trajneri Thomas Brdaric bëri një analizë të kundërshtarit.

“Po punojmë për këtë ndeshje, pasi dihet se sa e rëndësishme është ajo. Lojtarët duhet të përgatiten sa më mirë, kemi disa probleme që duhen zgjidhur, por nuk ka asnjë justifikim. Duhet një ekip konkurrues në fushë dhe në fund një rezultat pozitiv”, tha Thomas Brdaric, trajner i Vllaznisë.

Mungesat mbeten një shqetësim për kampin shkodran, i cili duhet të androjë formacionin ndaj kurbinasve.

Brdaric gjithashtu ka dhënë një vlerësim pozitiv për ekipin kundërshtar.

“Me mungesën e 4 lojtarëve me eksperiencë në mbrojtje si Stojanoviç, Juriç, Jago e Gurishta, do të jetë e vështirë, gjatë stërvitjes do gjejmë 11shen e duhur. Gruda po ashtu mungon. Laci është ekip fleksibël, ka një trajner që po bën mirë, por do të synojmë të marrim 3 pikët”, u shpreh trajneri i Vllaznisë.

Kryendeshja e kësaj jave është ajo që luhet në Elbasan Arena, derbi mes Dinamos dhe Tiranës.