Ambasadori i BE-së: Lufta kundër krimit dhe korrupsionit thelbësore për integrimin

Ambasadori i Delegacionit të Bashkimit Europian në Tiranë, Silvio Gonzato, mori pjesë këtë të enjte në ceremoninë e organizuar për 5-vjetorin e krijimit të SPAK.

Në fjalën e tij, ambasadori Gonzato përgëzoi punën e SPAK, duke theksuar se ky institucion ka krijuar një strukturë solide dhe ka dhënë rezultate të prekshme në luftën kundër korrupsionit dhe krimit të organizuar. Ai nënvizoi se suksesi i SPAK është një element kyç për avancimin e Shqipërisë në proceset integruese dhe në rrugën drejt anëtarësimit në Bashkimin Europian.

“Lufta kundër korrupsionit dhe krimit të organizuar është thelbësore për përparimin e Shqipërisë në procesin e integrimit europian. SPAK ka arritur rezultate konkrete në disa çështje të profilit të lartë, duke rikuperuar miliona euro pasuri të përfituara përmes veprimtarive korruptive dhe ka ndihmuar në goditjen e organizatave kriminale brenda dhe jashtë vendit,” tha Gonzato.

Duke vlerësuar arritjet e SPAK, ai u shpreh se qytetarët shqiptarë e konsiderojnë këtë institucion si më të besueshmin në vend, një tregues i qartë i punës së palodhur të këtij ekipi. Por, Gonzato apeloi që puna të mos ndalet këtu dhe të ketë një përqendrim edhe më të madh në të ardhmen, duke shtuar se rezultatet e integrimit europian do të varen nga vijimësia e luftës kundër krimit dhe korrupsionit.

“Nuk duhet të flemë mbi dafina, rezultatet pozitive që kemi parë deri tani duhet të shtyjnë për më shumë përpjekje. Sekuestrimi dhe konfiskimi i pasurive të paligjshme duhet të mbetet një prioritet i vazhdueshëm,” tha ambasadori i BE-së.

Megjithatë, Gonzato theksoi se SPAK nuk mund dhe nuk duhet të mbetet i vetëm në këtë përballje:
“SPAK nuk është dhe nuk duhet të jetë institucioni i vetëm në luftën kundër korrupsionit dhe krimit të organizuar. Ripërforcimi i bashkëpunimit midis të gjitha institucioneve të drejtësisë është kyç për të forcuar besimin e publikut te sundimi i ligjit dhe për të ndërtuar një sistem drejtësie të qëndrueshëm.”

LEXONI GJITHASHTU:

• Ceremonia për 5-vjetorin e SPAK, Altin Dumani: Treguam që nuk ka të paprekshëm
• SPAK mbush 5 vite, zyrtari i lartë amerikan i pranishëm në Tiranë për ceremoninë