Të dënuar me 20 vite burg, shqiptarët arratisen nga burgu grek. Morën 5 ditë leje…

Arratisja e dy shqiptarëve nga një burg grek ka ngritur në këmbë autoritete policore, por nga ana tjetër ka vënë në pikëpyetje masat e sigurisë në këto institucione.

Romeo Qosja dhe Lefter Toçi u arratisën nga burgu grek në Kassavetia mbrëmjen e 2 Janarit.

Dy të burgosurit ishin dënuar me nga 20 vite burg për vepra të rënda kriminale.

Romeo Qosja nga Cërriku i dënuar për vrasje, grabitje, shkatërrim prone me zjarr dhe armëmbajtje pa leje dhe Lefter Toçi nga Bradasheshi i Elbasanit i dënuar për pjesëmarrje në organizatë kriminale, bashkëpunim në vrasje, plagosje me pasojë vdekje, grabitje, shkatërrim prone me zjarr.

Të arratisurve u kishin dhënë pesë ditë pushim në vitin 2024 dhe me sa duket përfituan nga leja për të planifikuar arratisjen e tyre.

Zhdukja e tyre u zbulua në orën 21:00 të së enjtes kur efektivët shkuan të kontrollonin qelitë dhe i gjetën bosh.

Që nga viti 2019 mbaheshin në burgje të sigurisë së ulët, në një zonë të parrethuar, për shkak të sjelljes së mirë. Dhoma e tyre kontrollohej vetëm disa herë në ditë nga stafi. Në 5 vite ata kishin përfituar 5 herë leje për të dalë.

LEXONI GJITHASHTU:

• I vodhi me dhunë 400 euro punonjësit të një lavazhi, ndalohet 19-vjeçari
• Një shqiptar dhe 3 të burgosur të tjerë arratisen nga spitali psikiatrik në Gjermani