Napoli kërkon me çdo kusht Zhegrovën, gazetari italian zbulon prapaskenat

Futbollisti Edon Zhegrova ka bërë të ditur dëshirën për të ndërruar ambient dhe për të lënë pas aventurën e tij te Lille OSC. Megjithëse klubi francez refuzoi ta largonte gjatë verës.

Por tashmë interesimi për reprezentuesin kosovar është në rritje, veçanërisht pas paraqitjeve të tij mbresëlënëse në Ligën e Kampionëve dhe kontributit të tij vendimtar gjatë ndeshjeve të fundit.

Sipas burimeve të besueshme nga gazetari sportiv italian Fabrizio Romano, Napoli ka kontaktuar Lille për të negociuar transferimin e Zhegrovës në këtë afat kalimtar. Por “Les Dogues” nuk duket se do ta lehtësojnë këtë proces, pasi dëshirojnë të mbajnë lojtarin deri në përfundimin e sezonit, me shpresën për të rritur vlerën e tij.

Mediat italiane raportojnë se Zhegrova mund të jetë pasuesi ideal i Khvicha Kvaratskhelia, i cili pritet të largohet drejt Paris Saint-Germain. Për këtë arsye, Napoli e sheh anësorin kosovar si një zgjidhje afatgjatë për krahun e tyre të majtë.

Zhegrova, përmes agjentit të tij, po këmbëngul për largimin nga Lille dhe transferimin drejt Serisë A. Nëse marrëveshja finalizohet, ai do të kishte mundësinë të rritet edhe më shumë në një kampionat të njohur, siç është ai italian.

LEXONI GJITHASHTU:

• Zhegrova: Franca s’e njeh Kosovën, po e prezantoj në mënyrë të shkëlqyer te shokët
• Juventus apo Roma? Ylli Edon Zhegrova zbulon të ardhmen në “Max Sport”