Zjarri i ri në Kaliforni: Rrezik përhapje nga rikthimi i erërave

Një zjarr i ri ka shpërthyer në qytetin Oksnard në Kaliforni pas zjarreve të rënda që kanë përfshirë gjithashtu Los Anxhelosin.

Zjarri ka nisur në një shtrat të tharë lumi natën e së hënës dhe po përhapet me shpejtësi në zonat agrikulturore të kontesë, duke shkaktuar shqetësime të mëdha për rrezikun e rikthimit të erërave të forta.

Meteorologët kanë paralajmëruar se erërat kanë nisur të fryjnë në orët e para të së martës dhe pritet të vazhdojnë deri mesditën e së mërkurës. Megjithëse nuk pritet të kenë forcën e uraganeve të javës së kaluar, ato mund të pengojnë përpjekjet për shuarjen e flakëve nga ajri.

Ndërkohë, për arsye sigurie, janë shpërndarë cisterna me ujë në Oksnard dhe janë vendosur ekipe emergjencash në zonat më të rrezikuara.

Zjarri që po shkatërron zonën e Kalifornisë Jugore ka ndikuar edhe në industrinë e filmit. Nominimet për çmimet Oscar janë shtyrë për shkak të pasojave të zjarreve, të cilat kanë shkaktuar dëme të mëdha në Hollywood dhe zonat përreth.

Akademia e Arteve dhe Shkencave të Filmit njoftoi se votimi për nominimet do të zhvillohet më 17 janar, ndërsa shpallja e nominimeve do të bëhet online më 23 janar. Ceremonia e 97-të e çmimeve Oscar është shtyrë për më 2 mars në Teatrin Dolby.

Ndërkohë, Akademia ka bërë të ditur se ka dhuruar 750,000 dollarë për të ndihmuar të prekurit nga zjarret, ndërsa ka anuluar drekën vjetore të kandidatëve dhe ka shtyrë Çmimet Shkencore dhe Teknike, të planifikuara për 18 shkurt.

Zjarret e paprecedentë që nisën më 7 janar kanë shkaktuar tragjedi, duke lënë të vdekur të paktën 24 persona deri më 12 janar.

LEXONI GJITHASHTU:

• Rritet rreziku nga zjarret në Kaliforni, 80 mijë njerëz pa energji elektrike
• Zjarret në Los Angeles, të famshmit mobilizohen për të ndihmuar të prekurit