Ndikimi i Trump në ekonominë e Kosovës, si e shohin situatën analistët e ekonomisë

Presidenti Donald Trump, ndërmjetësoi nënshkrimin e një marrëveshjeje për normalizimin e marrëdhënieve ekonomike midis Kosovës dhe Serbisë, më 4 shtator të vitit 2020. Por rikthimi i tij në krye të SHBA-ve, mund të sjellë ndryshime në ekonominë e Kosovës.

Profesori i ekonomisë, Ilir Hajdini shprehet optimist se marrëveshja e vitit 2020 mund të riaktivizohet.

“Do të ketë ndikime, por varet se si i qasemi ne SHBA-ve, varet se kush do të jetë në qeverinë e ardhshme në Kosovë. Po ashtu ata mund të rikthejnë çështjen e negociatave që i ka pas Kosova me Serbinë nën administratën e Trumpit para katër vitesh”, tha profesori i ekonomisë.

Ndërsa, ndryshe nga Hajdini, njohësi i çështjeve ekonomike, Emanuel Bajra, shprehet skeptik se mund të riaktivizohet marrëveshja për normalizim ekonomik.

“Nuk jam i sigurt se marrëveshja e vitit 2020 do të rigjallërohet për shkak se eksponenti kryesor i kësaj marrëveshje që është Richard Grinell, nuk e ka përgjegjësi Kosovën tash për tash. Mos të harrojmë që kemi të bëjmë me një president shumë të paparashikueshëm”, tha Emanuel Bajra.

Për analistët e ekonomisë, rreziku më i madh për Kosovën në periudhën e ardhshme do të vijë nga një situatë e mundshme në të cilën Serbia refuzon të njohë shtetin e Kosovës, edhe pse fitorja e Trump është përshëndetur nga liderët institucionalë e partiakë në vend.

LEXONI GJITHASHTU:

• Grenell për Kosovën: Pse nuk u ankua para inagurimit të Presidentit Trump
• Ukrainasit skeptikë nëse Presidenti Trump mund t’i japë fund luftës me Rusinë