Salwan Momika, personi që dogji Kuranin, qëllohet për vdekje në Suedi

Salwan Momika, personi që shkaktoi protesta të dhunshme pasi dogji një kopje të Kuranit, është qëlluar për vdekje në një apartament në Södertälje, pranë Stokholmit, mbrëmjen e së mërkurës. Lajmi u konfirmua nga prokurorët suedezë për BBC.

Sipas policisë së Stokholmit, pesë persona janë arrestuar në lidhje me këtë ngjarje. Momika, një irakian që jetonte në Suedi, u qëllua rreth orës 23:11 me orën lokale dhe u transportua në spital, ku ndërroi jetë të enjten në mëngjes. Mediat suedeze raportojnë se ai ishte duke transmetuar drejtpërdrejt në mediat sociale në momentin e të shtënave.

Momika u bë figurë kontroverse në vitin 2023 pasi dogji një kopje të Kuranit jashtë Xhamisë Qendrore të Stokholmit, duke shkaktuar zemërim dhe protesta në disa vende me shumicë myslimane. Ai ishte nën hetim për “agjitacion kundër një grupi etnik” në katër raste gjatë verës së atij viti dhe pritej të dënohej këtë të enjte, por procesi gjyqësor u pezullua pas konfirmimit të vdekjes së tij.

Ndërkohë, kryeministri suedez Ulf Kristersson tha se shërbimet e sigurisë janë përfshirë në hetim, duke nënvizuar mundësinë e lidhjeve me fuqi të huaja.

Ngjarja ka rikthyer në vëmendje debatin për lirinë e shprehjes në Suedi, pasi autoritetet e kishin lejuar fillimisht protestën e Momikës, por më pas nisën të shqyrtonin kufizime ligjore për djegien e librave fetarë në rrethana të caktuara.

LEXONI GJITHASHTU:

• Kryeministri i Suedisë bën thirrje për qetësi dhe reflektim pas djegies së Kuranit
• Suedia synon të dërgojë të dënuar në burgje jashtë vendit, s’ka më kapacitete