KQZ miraton modelin e fletës së votimit për emigrantët dhe rregullat

Komisioni Rregullator në KQZ miratoi këtë të premte detajet e fletës së votimit që do t’u dërgohet votuesve shqiptarë në diasporë.

Përveç elementëve identifikues, në pjesën e pasme u shtuan dy shirita anësorë të dallueshëm, pas propozimit të dy anëtarëve të opozitës në Komisionin Rregullator, Helga Vukaj dhe Muharrem Çakaj.

Fleta e votimit për emigrantët do të ketë në pjesën e pasme të saj dy shirita vertikalë në një nuancë të përafërt me të kaltrën, që do ta dallojë atë nga fleta e votimit për votuesit brenda vendit.

Komisioni Qendror i Zgjedhjeve do të vijojë punën për përgatitjen e zarfeve dhe materialeve zgjedhore sipas parashikimeve ligjore. Deri më tani, në faqen zyrtare të KQZ-së janë regjistruar mbi 131 mijë persona, ndërsa afati përfundimtar për regjistrimin si votues është data 4 mars.

Ndërkohë, KQZ është ende në pritje të ndryshimeve në Kodin Zgjedhor, të cilat synojnë të lehtësojnë votën e diasporës duke ndryshuar afatet për regjistrimin e kandidatëve dhe subjekteve zgjedhore më 11 maj.

LEXONI GJITHASHTU:

• Gjiknuri: 130 mijë shqiptarë të diasporës të regjistruar deri tani, impresionuese
• Rama mbledh drejtuesit politikë të qarqeve, ndan shqetësimin për votën e diasporës