Scholz: Të mos ketë ndarje mes SHBA-së dhe BE-së në bisedimet për paqe në Ukrainë

Kancelari gjerman, Olaf Scholz ka bërë thirrje të hënën për unitet mes Evropës dhe Shteteve të Bashkuara sa i përket përgjegjësisë dhe garantimit të sigurisë për Ukrainën.

Ai i ka bërë këto komente pak orë pas deklarimeve të zyrtarëve amerikanë se Bashkimi Evropian mund të mos konsultohet për nisje të bisedimeve për paqe me Rusinë, me qëllim të dhënies fund të luftës në Ukrainë.

“Nuk duhet të ketë ndasi për sigurinë dhe përgjegjësinë në mes të Evropës dhe SHBA-së”, ka thënë Scholz për gazetarët, pas mbajtjes së një samiti urgjent evropian në Paris.

“Me fjalë tjera, NATO-ja funksionon mbi faktin se ne veprojmë gjithmonë së bashku dhe ndajmë rrezikun, dhe kështu edhe garantojmë siguri. Kjo nuk duhet të vihet në pikëpyetje”, ka thënë mes tjerash Scholz.

Përveç Scholzit, pjesë e takimit ka qenë kryeministri britanik Keir Starmer, shefja e Komisionit Evropian, Ursula von der Leyen, shefi i NATO-s, Mark Rutte, dhe presidenti francez, Emmanuel Macron, si nikoqir i takimit.

Kancelari gjerman e ka quajtur shumë të hershëm diskutimin për dërgimin e forcave evropiane paqeruajtëse në Ukrainën.

“Jam pak i irrituar nga këto debate”, ka thënë Scholz pas takimit me liderët evropianë.

Sipas tij, ky diskutim nuk po bëhet në kohën e duhur, sepse ende nuk është arritur paqja, por Ukraina është në mesin e një lufte brutale të nisur nga Rusia.

Në nisje të samitit, kryeministri britanik, Keir Starmer ka thënë se është i gatshëm të dërgojë forca paqeruajtëse në Ukrainë, nëse është e nevojshme.

Edhe Macroni ka kohë që bën thirrje për formim të një force evropiane paqeruajtëse.

Scholz ka thënë se është krejtësisht kundër dërgimit të ushtarëve në Ukrainë pa përfshirjen amerikane.

LEXONI GJITHASHTU:

• Përplasen 2 automjete në Berat-Roskovec, aksidentohet bariu, humb jetën në spital
• Starmer: Ukrainës i duhet një marrëveshje e qëndrueshme paqeje, jo pauzë për Putinin