Delegacioni rus takohet me atë amerikan në Stamboll, detaje nga diskutimet

Diplomatët rusë dhe ata amerikanë janë takuar të enjten në Turqi për të diskutuar dhe zgjidhur mosmarrëveshjet mbi funksionimin e ambasadave përkatëse në Uashington dhe Moskë.

Bisedimet, të cilat janë ende në zhvillim, shihen si një mundësi e parë për të dyja palët për të përmirësuar marrëdhëniet dhe për të diskutuar mundësinë e një zgjidhjeje për luftën në Ukrainë.

Departamenti Amerikan i Shtetit tha se bisedimet, të cilat do të udhëhiqen nga zyrtarë të nivelit të ulët, nuk do të përfshijnë çështje politike apo të sigurisë, përfshirë Ukrainën. “Për të qenë të qartë, Ukraina nuk është në rendin e ditës,” tha një zëdhënës i Departamentit të Shtetit.

Ekipi rus mbërriti në Stamboll në një furgon të zi të tipit “Mercedes”, i cili hyri në selinë e konsullatës së përgjithshme amerikane për një takim që pritet të zgjasë rreth 5 deri 6 orë.

Sipas autoriteteve amerikane, konstruktiviteti i këtyre bisedimeve do të bëhet i dukshëm shpejt, dhe do të shihet nëse Rusia është vërtet e gatshme të angazhohet me mirëbesim në negociata.

Bisedimet do të fokusohen në përmirësimin e kushteve për diplomatët rusë në SHBA dhe homologët e tyre amerikanë në Rusi, pas një sërë mosmarrëveshjesh rreth niveleve të personelit dhe pronave të ambasadave. Ministri i Jashtëm rus, Sergei Lavrov, tha se rezultatet do të tregojnë sa shpejt dhe në mënyrë efektive mund të përparojnë marrëdhëniet.

Vitin e kaluar, Kremlini deklaroi se marrëdhëniet SHBA-Rusi nën administratën e presidentit Joe Biden kishin arritur një pikë të ulët, “nën zero”. Megjithatë, me ardhjen e presidentit Trump, gjërat duket se po fillojnë të ndryshojnë.

LEXONI GJITHASHTU:

• Zelensky flet për marrëveshjen me Trump: Fillimi i një suksesi të madh
• Çfarë përfshin marrëveshja Trump-Zelensky, pse SHBA i do me çdo kusht mineralet