Ish-këshilltari i Netanyahut në Euronews Albania: Zgjidhja që paraqes për Gazën

Në një intervistë për gazetarin Thimi Samarxhiu në Euronews Albania, Daniel Rubenstein, ish-këshilltar i kryeministrit izraelit Benjamin Netanyahu, foli mbi situatën në Rripin e Gazës.

Rubenstein deklaroi se gjendja në Gaza mund të ndryshojë vetëm me krijimin e një qeverie të re që të garantojë paqen dhe sigurinë në rajon.

Rubenstein theksoi se Hamasi ka marrë nën kontroll ndihmat humanitare në Gaza dhe po i takson ato, duke i lënë qytetarët palestinezë dhe pengjet izraelitë pa ushqim.

“Momentalisht, Hamasi kontrollon Gazën dhe është i njëjti entitet që kreu sulmet terroriste. Ata po keqpërdorin ndihmat dhe po torturojnë pengjet. Nëse duam një paqe të qëndrueshme, duhet të kemi një qeveri të re në Gaza,” u shpreh Rubenstein.

I pyetur nga moderatori se kush mund ta qeverisë Gazën, ish-këshilltari i Netanyahut tha se duhet të jetë një strukturë që angazhohet për paqe dhe që nuk kërkon shkatërrimin e Izraelit.

Lidhur me të ardhmen e Gazës, ai shtoi se diskutimi mbi një zgjidhje me dy shtete duhet të negociohet, por për sa kohë që Hamasi mbetet në pushtet dhe vazhdon politikën e tij agresive, paqja mbetet e paarritshme.

Në lidhje me marrëdhëniet ndërkombëtare, Rubenstein vlerësoi Shqipërinë për mbështetjen historike ndaj hebrenjve gjatë Luftës së Dytë Botërore.

LEXONI GJITHASHTU:

• Kina dhe Kanadaja hakmerren me hyrjen në fuqi të tarifave të Trump
• Aeroplanmbajtësja amerikane viziton Korenë e Jugut