Në kërkim për disa vepra penale, arrestohet 31-vjeçari në Tiranë

Një 31-vjeçar, i shpallur në kërkim për disa vepra penale, përfshirë trafikun e drogës dhe marrëdhënie seksuale me të mitur, është arrestuar të shtunën nga Policia e Tiranës. Shtetasi K. K(P.), banues në Lezhë, përfundoi në pranga pas një operacioni të koduar “Escape” të organizuar nga shërbimet e Komisariatit të Policisë Nr. 3.

Gjykata e Apelit të Shkodrës e kishte dënuar këtë shtetas me 3 vite e 4 muaj burgim për veprën “Prodhimi dhe shitja e narkotikëve”. Po ashtu, Gjykata e Lezhës ka vendosur masën e sigurisë “Arrest me burg” për veprat penale “Marrëdhënie seksuale ose homoseksuale me të mitur” dhe “Largimi i të burgosurit nga vendi i qëndrimit”.

“Shërbimet e Komisariatit të Policisë Nr. 3, në vijim të punës për kapjen e personave të shpallur në kërkim dhe vënien e tyre para përgjegjësisë ligjore, bazuar dhe në informacionet e marra në rrugë operative, për vendndodhjen e një shtetasi në kërkim, organizuan dhe finalizuan operacionin policor të koduar “Escape”, si rezultat i të cilit u bë kapja e shtetasit: K. K(P)., 31 vjeç, banues në Lezhë”, njofton policia.

 LEXONI GJITHASHTU:

• EMRAT| Shisnin kokainë e kanabis pranë shkollave në Kavajë, arrestohen 13 persona
• Operacion i madh antidrogë në Kavajë – Policia shoqëron dhjetëra persona