Zhvillohet për herë të parë Kampionati Kombëtar i Pingpongut në Gjirokastër

Në Gjirokastër për dy ditë rradhazi u zhvillua Kampionati Kombëtar i Pingpongut për moshat 15 dhe 19 vjeç. Në këtë event sportiv morën pjesë reth 70 sportistë të ekipeve të K.S. Tiranës, Teutës, Elbasanit, Beratit dhe Përmetit. Pjesëmarrësit vlerësuan organizime të tilla në rrethe për ripërtëritjen e traditës në sportin e pingpongut.

“Për herë të parë organizojmë në Gjirokastër, Kampionatin Kombëtar të moshave U 15 dhe U 19,  nga të cilët do të dalin lojtarët më të mirë që do të përfaqësojnë edhe kombëtaren  shqiptare në aktivitetet e Ballkanit. Në Gjirokastër ka patur ping pong në vitet e para por sot shohim Gjirokastrën që nuk ka ekipe  për këto mosha por, ne e bëjmë edhe në formë sensibilizimi  që moshat e reja, kalamajtë dhe të rinjtë të afrohen tek ping pongu”, tha Tonin Binoshi, Sekretar i Federatës së Ping Pongut.

“Është kënaqësi që marrim pjesë sot në Gjirokastër sepse kjo ka të bëjë  me shtrirjen gjeografike  të këtij lloj sporti  që ka mbetur në kufijtë e minimumit. Jam shumë e surprizuar edhe nga  ambjenti i Pallatit të Sportit. Mendoj dhe respektoj të gjithë kontributin e të gjithë sportistëve pjesëmarrës në këtë aktivitet”, tha trajnere Greta Kovaçi.

Nga ana tjetër, dy sportistë, një vajzë dhe një djalë, shprehen mjaft të kënaqur që janë angazhuar në këtë aktivitet qoftë për vetë sportin e Ping Pongut që i mban aktiv, por jo vetëm, edhe avantazhi i të njohurit kultura të ndryshme teksa zhvillohet dhe jashtë Tiranës.

“Mendoj se ky kampionat është një organizim shumë i mirë, sepse jo vetëm që zhvillon edhe qytetet që janë jashtë Tiranës, jo vetëm të jetë gjatë gjithë kohës në qendër Tirana, por gjithashtu na bën edhe ne sportistëve të njihemi më shumë me njëri–tjetrin por edhe  të njohim kultura të ndryshme”, tha sportistja.

“Unë kam zgjedhur sportin e ping pongut dhe e ndjek që prej 7 vitesh këtë sport. Është sport i bukur, të mban gjallë, është aktiv”, tha i riu.

Tashmë qyteti i Gjirokastrës po shërben si qendër për organizimin e eventeve kombëtare dhe ndërkombëtate në sporte të ndryshme.

LEXONI GJITHASHTU:

• Shfaqja “15 ditë prilli” ngjitet në skenën e Teatrit Kombëtar nga Anisa Markarian
• U kthye nga Greqia në Shqipëri, 26-vjeçarja hap qendrën e trajnimit për fëmijë