“Reformat ndikojnë në uljen e borxhit”, Moody’s: Ekonomia në rritje e qëndrueshmëri

Agjencia “Moody’s” ka konfirmuar vlerësimin e Shqipërisë me perspektivë “të qëndrueshme”.

Për agjencinë, ndikim pozitiv në ekonomi po japin reformat, ulja e borxhit dhe ecuria aktuale ekonomike.

Reformat që janë ndërmarrë për integrimin në Bashkimin Europian dhe ecuria ekonomike janë dy pika kyçe për të konfirmuar notën “Ba3” që agjencia “Moody’s” ka vendosur për Shqipërinë.

Vlerësimi Ba3 përkon me një ekonomi me të ardhme të qëndrueshme, ku rritja ekonomike do të jetë 3.8% në vitin 2025 dhe 3.4% në vitin 2026. Në raportin e “Moody’s”, vlerësohet edhe reduktimi i borxhit, i cili do të ulet nga 57.5% në vitin 2023 në 53.7% deri në vitin 2026.

Ndërkohë, rëndësi u jepet edhe reformave për procesin e anëtarësimit në BE, nga të cilat Shqipëria do të përfitojë nga financimi dhe përputhja e ligjeve me Europën.

Vlerësimi i “Moody’s” është një sinjal pozitiv edhe për investitorët ndërkombëtarë, duke reflektuar qëndrueshmërinë ekonomike të vendit dhe menaxhimin efektiv përballë sfidave globale. Në raportet periodike mujore për vendin tonë, ky është rishikimi i dytë në rritje brenda një viti për ekonominë shqiptare.

LEXONI GJITHASHTU:

• Çmimet e energjisë në treg të lirë janë ulur, bizneset me alternativa furnizimi
• Këmbimi valutor në monitorim për pastrimin e parave, hiqen 24 licenca