“Një krizë e re po vjen”- Paralajmërimi i fortë i kancelarit të ardhshëm gjerman

Kancelari i ardhshëm i Gjermanisë, Friedrich Merz, ka paralajmëruar se politikat tregtare të presidentit amerikan Donald Trump po rrisin ndjeshëm rrezikun e një krize të re financiare globale.

“Kriza tjetër financiare do të vijë patjetër. Ne thjesht nuk e dimë kur dhe pse,” deklaroi Merz në një intervistë për mediat gjermane, duke theksuar se masat e fundit të administratës amerikane mund të përshpejtojnë shpërthimin e saj.

Ai iu referua konkretisht regjimit tarifor të vendosur nga Trump, i cili ka tronditur tregjet ndërkombëtare gjatë dhjetë ditëve të fundit dhe ka nxitur frikën për një recesion të mundshëm. Edhe pse Shtëpia e Bardhë ka zbutur disa nga këto masa, përfshirë përjashtimin e produkteve si telefonat dhe kompjuterët, pasiguria në tregje mbetet e lartë.

Friedrich Merz, i cili pritet të marrë zyrtarisht detyrën më 6 maj pas arritjes së një marrëveshjeje koalicioni me Partinë Socialdemokrate (SPD), ka theksuar rëndësinë e një qasjeje të re tregtare. Ai njoftoi se synon një marrëveshje transatlantike pa tarifa me Shtetet e Bashkuara, si dhe marrëveshje të tjera dypalëshe me vende si Kanadaja, Koreja e Jugut dhe India.

Sipas tij, ndërprerja e negociatave për Partneritetin Transatlantik të Tregtisë dhe Investimeve (TTIP) në vitet 2010 përbën “një mundësi të humbur” për të dyja palët.

Merz gjithashtu u shpreh se Gjermania është e hapur për importimin e gazit natyror të lëngshëm nga SHBA, duke e parë këtë si një element kyç për thellimin e bashkëpunimit energjetik mes Bashkimit Evropian dhe Shteteve të Bashkuara.

Në vijim të intervistës, ai theksoi nevojën për një reagim të përbashkët evropian ndaj presionit që vjen nga Uashingtoni. “Evropa duhet të flasë me një zë dhe të shfrytëzojë këtë moment për të zbatuar reformat e nevojshme të brendshme”, deklaroi ai.

Merz u ndal edhe tek nevoja për një integrim më të thellë të tregjeve të kapitalit në BE, duke përmendur bisedimet e tij me liderët kryesorë evropianë si Emmanuel Macron, Donald Tusk dhe Keir Starmer. “Dinamika e re do të zhvillohet në muajt e ardhshëm”, shtoi ai.

LEXONI GJITHASHTU:

• Pas pezullimit të tarifave nga Trump, edhe BE heq kundërmasat ndaj SHBA
• Trump pezullon me 90 ditë tarifat e reja, përveç Kinës, të cilës i rriten në 125%
• Efektet e tarifave të Trump dhe lufta tregtare, bie besimi në ekonminë amerikane