Si po ruhet trupi i Papës, praktika e lashtë që e mbron nga dekompozimi

Për t’u siguruar që besimtarët të mund ta shohin dhe të bëjnë homazhet e tyre, Papa Françesku i është nënshtruar teknikës së ruajtjes së trupit të quajtur thanatopraksi.

Trupi i tij mbahet në një arkivol të thjeshtë prej zinku brenda një tjetër arkivoli prej druri, që do të qëndrojë i hapur gjatë procesit të ekspozimit.

Para se të ndërronte jetë, ati i shenjtë insistoi që trupi i tij të mos vendosej në një katafalkë, siç njihet arkivoli tradicional i përbërë nga dru selvie, lisi dhe plumb.

Thanatopraksia nuk është mumifikim, por një teknikë për ruajtjen e trupit e përdorur për ekspozimin publik të trupave të pajetë.

Praktika, e lejuar në Itali në bazë të një ligji të miratuar në 2022-shin, konsiderohet një metodë moderne dhe evolutive balsamimi dhe dallohet nga përdorimi i substancave më pak agresive, të cilat respektojnë trupin e njeriut.

Ajo konsiston në një trajtim higjenik që ngadalëson procesin e dekompozimit, duke lejuar që paraqitja natyrale e të ndjerit të ruhet për disa ditë.

Procedura përfshin injektimin e lëngjeve mbrojtëse në sistemin arterial, dezinfektimin e plotë të trupit, një “make up” të moderuar, si dhe pozicionimin e duarve dhe rregullimin e fytyrës për të garantuar një paraqitje paqësore.

Në të kaluarën, papat i nënshtroheshin balsamimit, një teknikë më agresive që parashikon heqjen e organeve të brendshme dhe injektimin e substancave të forta si formalin dhe alkool.

LEXONI GJITHASHTU:

• Trupi i Papa Françeskut zhvendoset në Bazilikën e Shën Pjetrit për homazhe
• A do të jetë Papa i ardhshëm nga Afrika?