U plagos gjatë përplasjes së armatosur në Laç, ndërron jetë 24-vjeçari

24-vjeçari Gerald Bitri, një nga pesë të plagosurit e përplasjes me armë mesditën e së shtunës në Laç, ka ndërruar jetë në spitalin e Traumës.

I riu nuk ka mundur t’u mbijetojë plagëve të marra dhe ka gjetur vdekjen gjatë natës.

Pesë persona mbetën të plagosur një ditë më parë pranë ish-Gjykatës së Kurbinit, nga një breshëri arme që është derdhur drejt 4 të rinjve.

Ngjarja raportohet të ketë ndodhur pas një sherri mes një grupi të rinjsh në Laç ndërsa plumbat kanë kapur edhe një grua të pafajshme, e cila po shiste në trotuar.

Nga burime thuhet se të shtënat kanë ardhur pas një sherri dhe autori ka qëlluar me armë automatike drejt një makine ku ndodheshin 4 të rinj.

I dyshuari është larguar menjëherë nga vendi i ngjarjes, ndërsa burime thonë se policia ka arritur ta identifikojë atë dhe po punon për kapjen e tij.

Të plagosur nga të shtënat mbetën shtetasit Amarildo Ndoj, Liridon Ismaili, Daniel Gjeloshi, Angjelina Gjezaj dhe Gerald Bitri, cili ndërroi jetë në spitalin e Traumës.

LEXONI GJITHASHTU:

• Identifikohet autori i plagosjes së 5-fishtë në Laç, policia gjen një armë
• Mes tyre një grua, dalin emrat e 5 të plagosurve në Laç/ Policia njoftimin zyrtar