Berisha shfaqet me qeleshe në takimin e Mirditës: Kjo është java e njishave

Kryetari i Partisë Demokratike dhe koalicionit Aleanca për Shqipërinë Madhështore ka mbajtur këtë të diel takimin përmbyllës të fushatës elektorale. Ndryshe nga herët e tjera ku e kemi parë me kapele, në takimin në Mirëdita, kreu i PD-së është shfaqur me qeleshen tradicionale, në të cilën ishte edhe numri 1 Mirditë.

Në nisje të fjalës së tij, kreu i PD tha se “kjo është java e 1-shave, duke ju referuar numrit që ASHM mban në fletën e votimit.

“Kjo ishte dhe është java e njëshave. Njëshat kanë marrë në dorë sot fatin e Shqipërisë, kanë marrë në dorë fitoren e shumë pritur të datës 11 maj. Kudo që shkoj ndiej dritën, shkëlqimin e saj që buron nga zemra, shpirti dhe sytë e qytetarëve të ringritur me shpresë dhe besim për tu ndarë nga një e keqe që ata kurrë nuk e meritonin.

Për tu ndarë nga një e keqe e madhe që po shkreton Mirditën madhështore dhe Shqipërinë madhështore. Për tu ndarë nga një e keqe që po mbjell vetmi dhe pasiguri. Kur të ikin fëmijët dhe mbetesh vetëm, vetmia nuk është vetëm kaq dënohesh edhe me sigurinë e ditëve që do të vijnë. Këto janë epidemia e 11 viteve”,-tha Berisha.