Problematikat me votën e diasporës në Greqi, PD-KQZ: Na vërtetoni dorëzimin e zarfit

Teksa jemi futur në javën e fundit para zgjedhjeve të 11 majit, votat e diasporës të mbërritura në KQZ mbeten ende në nivele të ulëta krahasuar me regjistrimet.

Janë afro 100 mijë shqiptarë që u regjistruan në PER-in e KQZ, por që ende nuk e kanë sjellë votën e tyre në Shqipëri. Deri në mesditën e kësaj të hënë janë 144,783 zarfe të mbërritura në Shqipëri, nga 245,935 që KQZ ka dërguar.

Numri më i madh i të regjistruarve në diasporë që nuk kanë votuar ende vijon të jetë në Greqi, aty ku pjesëmarrja është 9.6%, ndërsa përqindja e të regjistruarve ishte 27.8%.

Lidhur me këtë problematikë të zgjedhësve shqiptarë që jetojnë dhe punojnë në Greqi, Partia Demokratike në emër të Aleanca për Shqipërinë Madhështore i është drejtuar me një shkresë zyrtare Komisionit Qendror të Zgjedhjeve ku kërkon “vënien urgjentisht në dispozicion të të gjitha komunikimeve, provave dhe dokumentacionit me të cilin operatori postar vërteton dorëzimin e zarfit dhe materialit zgjedhor tek çdo zgjedhës”.

“Nisur nga problematikat e shumta të raportuara sa i takon shpërndarjes së zarfeve me vota dhe materiale zgjedhore tek zgjedhësit shqiptarë me banim në Greqi, PD-ASHM kërkon urgjentisht vënien në dispozicion e të gjitha komunikimeve, provave dhe dokumentacionit me të cilin Operatori Postar vërteton dorëzimin e zarfit me votë dhe materiale zgjedhore, tek secili zgjedhës në mënyrë individuale në Greqi, i regjistruar si i tillë nga sistemi PER. Ky informacion dhe dokumentacion, kërkojmë të na vihet në dispozicion urgjentisht, në çdo rast përpara datës 11-Maj 2025”, thuhet mes të tjerash në kërkesën e depozituar nga ASHM në KQZ.

LEXONI GJITHASHTU:

• Vota e diasporës, Celibashi flet për procesin: Ja sa fletë votimi janë kthyer në KQZ
• Vota e diasporës, KQZ: Hapat që duhet të ndjekin votuesit për problemet me zarfet