Administrata Trump ngrin miliarda dollarë ndihmë për Harvardin

Departamenti i Arsimit i Shteteve të Bashkuara ka njoftuar Universitetin e Harvardit se po ngrin miliarda dollarë në grante kërkimore dhe ndihma të tjera derisa universiteti të bjerë dakord me një sërë kërkesash nga administrata e Presidentit Donald Trump, tha një zyrtar i lartë i departamentit.

Harvardi është bërë shënjestër e administratës për shkak të akuzave për antisemitizëm në kampus gjatë protestave nga organizatat pro-palestineze, thekson Reuters.

Në javët e fundit, administrata Trump ka shtuar veprimet e saj kundër Harvardit.

Ajo nisi një shqyrtim zyrtar të gati 9 miliardë dollarëve në fonde federale për Harvardin, duke kërkuar që universiteti të ndalojë praktikat e diversitetit, barazisë dhe përfshirjes, dhe të marrë masa të ashpra ndaj disa grupeve pro-palestineze që morën pjesë në protesta, si dhe ndaj përdorimit të maskave gjatë këtyre protestave.

Harvard hodhi poshtë një numër kërkesash nga administrata Trump muajin e kaluar, duke i quajtur ato një sulm ndaj lirisë së fjalës dhe lirisë akademike.

Universiteti e paditi administratën Trump pasi kjo e fundit pezulloi rreth 2.3 miliardë dollarë fonde federale për institucionin arsimor, duke premtuar se do të adresonte diskriminimin në kampus.

LEXONI GJITHASHTU:

• Trump kërkon zhbërjen e programit bërthamor të Iranit
• Trump vendos tarifë 100% për filmat e huaj: Duam filma të bëra në Amerikë