Sot Samiti i KPE në Tiranë, ja akset rrugore që do bllokohen dhe devijimi i trafikut

Në kuadër të masave të sigurisë për Samitin e gjashtë të Komunitetit Politik Evropian, që zhvillohet ditën e sotme në Tiranë, kanë nisur bllokimet e rrugëve në zona të ndryshme të kryeqytetit.

Qendra e qytetit është bërë e pakalueshme për automjete dhe këmbësorë, ndërsa qarkullimi është devijuar në disa akse kryesore.

Policia e Shtetit ka filluar zbatimin e një plani të detajuar masash për të garantuar mbarëvajtjen e aktivitetit, që për herë të parë zhvillohet në një vend të Ballkanit Perëndimor. Ndër masat e ndërmarra janë mbyllja e përkohshme e rrugëve, pezullimi i qarkullimit urban dhe ndërurban në disa segmente, si dhe lirimi i hapësirave publike për qëllime sigurie.

Policia ka publikuar gjithashtu një hartë me rrugët e bllokuara dhe alternativat për devijimin e trafikut. Masat do të jenë në fuqi deri në përfundim të punimeve të samitit dhe largimin e delegacioneve ndërkombëtare nga vendi.

Rrugët që bllokohen

Bllokim total të qarkullimit të automjeteve dhe këmbësorëve në perimetrin e sigurisë nga ora 06:00 deri në 18:00, më 16 maj, në këto rrugë:

“Sheshi Skënderbej”

Bulevardi “Zogu I”

Rruga “Myslym Shyri”

Rruga “Ibrahim Rugova”

Bulevardi “Dëshmorët e Kombit”

Rruga “Urani Pano”

Rruga e Barrikadave

Rruga “George W. Bush”

Banorët brenda perimetrit të sigurisë do të lëvizin vetëm me dokument identifikimi ndërsa parkimi dhe qarkullimi ndalohen për të gjithë të tjerët.

Devijimi i trafikut

Devijimi i trafikut bëhet si më poshtë:

Bulevardi Zogu I → devijim tek Ministria e Drejtësisë

Rruga e Durrësit → devijim tek Ministria e Arsimit

Rruga e Kavajës → devijim tek semafori i Lumit

Myslym Shyri → devijim tek Rr. Sami Frashëri

Rr. e Dibrës dhe Hoxha Tahsim → devijim tek Rr. Lef Nosi

Sheshi Skënderbej është tashmë i rrethuar dhe ndalohet kalimi, përfshirë edhe për këmbësorët. Po ashtu, bllokime të përkohshme do të ketë edhe gjatë datës 15 maj.

Policia njofton gjithashtu për kufizime në rrugën drejt aeroportit të Rinasit. Qytetarët me fluturime udhëtimi këshillohen të nisen të paktën 4 orë më herët, për të shmangur vonesa të mundshme.

LEXONI GJITHASHTU:

• Tirana mirëpret sot Samitin e 6 të Komunitetit Politik Evropian, mblidhen 47 liderët
• Përfaqësuesja e Lartë e BE-së Kaja Kallas vjen në Tiranë, axhenda e takimeve