Kufizohen kreditë për qytetarët që duan të blejnë shtëpi, rregullat e reja

Vendosen limite në dhënien e kredive për qytetarët, të cilët duan të blejnë shtëpi. Vendimi i Bankës së Shqipërisë është botuar ne fletoren Zyrtare, dhe nis te zbatohet nga muaji qershor.

Dokumenti përcakton kufij të sipërm për treguesin “raporti i kredisë ndaj vlerës”, që ndryshon në varësi të monedhës në të cilën merret kredia apo nëse është shtëpi e parë apo e dytë.

Më konkretisht, në monedhën lek, raporti i kredisë ndaj vlerës nuk duhet të kapërcejë masën 85 për qind, ndërsa në valutë 75 për qind. Ndërkohë, për blerjen e një shtëpie të dytë dhe vijuese, për monedhën lek raporti duhet të mos kapërcejë vlerën 80 për qind, ndërsa në valutë është 70 për qind.

Po ashtu, vendimi i Bankës së Shipërisë vendos kufij të sipërm për treguesin “raporti i shërbimit të borxhit ndaj të ardhurave, në disbursim”, duke specifikuar se për monedhën lek nuk duhet të kapërcejë vlerën 40% për shtëpinë e parë dhe 35% për shtëpinë e dytë e më tej. Ndërsa, më kredinë në valutë ky raport nuk duhet të kapërcejë vlerën 35% për shtëpinë e parë dhe 30% për të dytën e më tej.

Megjithatë, vendimi lejon bankat që të zbatojnë kuota përjashtimi nga kufizimet e mësipërme në secilin prej treguesve, me kushtin që, në total, vlera e kredive të përjashtuara të mos kapërcejë 15 për qind të vëllimit të kredive të reja që janë miratuar dhe disbursuar gjatë tremujorit.

LEXONI GJITHASHTU:

• Vendoset tavan për kreditë e shtëpive: 85% për banesën e parë, 80% e dyta
• Banka e Shqipërisë: Kreditë janë bërë më të lira për bizneset dhe qytetarët