Turqia reagon ashpër për sulmin izraelit ndaj anijes humanitare

Ministria e Punëve të Jashtme e Turqisë ka reaguar ashpër pas ndërhyrjes së ushtrisë izraelite ndaj anijes “Madleen”, e cila ishte nisur për të dërguar ndihma humanitare në Rripin e Gazës. Në një deklaratë zyrtare, Ankaraja e cilëson këtë veprim si “shkelje të qartë të së drejtës ndërkombëtare” dhe e quan Izraelin “shtet terrorist”.

“Ndërhyrja e forcave izraelite në ujëra ndërkombëtare ndaj një anijeje me ndihma, që mbante në bord edhe shtetas tanë, është një akt i paligjshëm dhe i papranueshëm,” thuhet në deklaratën e ministrisë. “Ky sulm i urryer nga qeveria e Netanyahut, që kërcënon lirinë e lundrimit dhe sigurinë detare, ka vërtetuar edhe një herë se Izraeli është shtet terrorist.”

Ministria turke shton se do të vazhdojë të kërkojë përgjegjësi ndërkombëtare për veprimet e Izraelit, të cilat, sipas saj, përdorin urinë si armë dhe pengojnë ndihmën humanitare në Gaza. “Qëndrimi agresiv i Izraelit nuk do t’i heshtë zërat që mbrojnë vlerat njerëzore,” përfundon deklarata.

Anija me vela, 18 metra e gjatë, u nis nga porti San Giovanni Li Cuti në Katania, Itali, më 1 qershor, si pjesë e misionit të organizuar nga Koalicioni i Flotiljes së Lirisë. Qëllimi i saj ishte të thyente bllokadën izraelite dhe të shpërndante ndihma në Gaza.

Sipas organizatorëve, ushtria izraelite ndërhyri gjatë natës në anijen “Madleen”, duke ndërprerë kontaktin me ekuipazhin. “Vullnetarët janë rrëmbyer nga ushtria izraelite,” thuhet në deklaratën e Koalicionit.

Në bord ndodheshin 12 persona, përfshirë emra të njohur si eurodeputetja franceze Rima Hassan, aktivistja suedeze Greta Thunberg, gazetari Omar Faiad dhe qytetarë nga Turqia, Brazili, Gjermania, Spanja, Holanda dhe Franca.

Ngjarja ka ngjallur reagime të forta ndërkombëtare dhe ka rritur tensionet mes Turqisë dhe Izraelit, në një kohë kur situata humanitare në Gaza mbetet kritike.

LEXONI GJITHASHTU:

• SHBA i jep 500 milionë dollarë USAID, ndihma për Gazën
• Izraeli “rrëmben” anijen me aktivistë ndërkombëtarë, po dërgonin ndihma drejt Gazës