Parisi përjashton kompanitë izraelite të armëve nga panairi, reagon ashpër Izraeli

Organizatorët e Panairit Ajror të Parisit kanë ndaluar pjesëmarrjen e disa kompanive izraelite të industrisë së mbrojtjes, me arsyetimin se po ekspozonin “armë sulmuese” në kundërshtim me rregullat e ekspozitës.

Stendat e pesë prodhuesve izraelitë, përfshirë Israel Aerospace Industries (IAI), Rafael dhe Elbit Systems, u mbuluan me struktura të zeza dhe u izoluan nga pjesa tjetër e ekspozitës.

Vendimi u mor pas një rishikimi të produkteve të ekspozuara, që sipas organizatorëve binin ndesh me kriteret e panairit.

Sipas një raportimi nga Al Jazeera, disa prej këtyre kompanive furnizojnë ushtrinë izraelite me teknologji të avancuar luftarake, përfshirë dronë dhe sisteme raketore që janë përdorur në fushatat ushtarake në Gaza.

Një përfaqësues i kompanisë Rafael u shpreh i befasuar dhe i indinjuar nga vendimi, duke thënë se nuk ishte njoftuar paraprakisht për përjashtimin. Edhe Ministria izraelite e Mbrojtjes reagoi ashpër, duke e quajtur vendimin “një akt diskriminues dhe skandaloz”, që sipas saj, “nuk bazohet në rregulla teknike, por në konsiderata politike dhe ekonomike”.

Ky përjashtim ndodh në një kohë kur rritet presioni ndërkombëtar mbi Izraelin për ndërhyrjet ushtarake në Gaza dhe përdorimin e armëve të prodhuara nga këto kompani në sulme që kanë shkaktuar viktima mes civilëve.

LEXONI GJITHASHTU:

• Kush ishin katër gjeneralët iranianë të vrarë në sulmin izraelit?
• Lideri Suprem i Iranit evakuohet në bunkerin e sigurt në Teheran