Gjyqi për “Gërdecin”| Mediu zbulon letrën që kanë dërguar kongresmenët amerikanë

Në GJKKO u mbajt këtë të mërkurë seanca e radhës për “Gërdecin”, dosje në të cilën ish-ministri i Mbrojtjes Fatmir Mediu është nën akuzë për shpërdorim detyre dhe shkelje të procedurave në ngritjen e fabrikës së demontimit. Gjatë seancës Mediu kundërshtoi akt-ekspertizën e paraqitur nga grupi i ekspertëve.

Ish-ministri kërkoi që gjykata të marrë parasysh dëshmitë e personaliteteve politike dhe ushtarake të kohës të dhëna në SHBA, duke vënë në dijeni dhe për një letër që 6 kongresmenë amerikanë i kanë dërguar Ministrisë së Drejtësisë.

“6 kongresmenë amerikanë i kanë dërguar një letër Ministrisë së Drejtësisë së Shqipërisë, ku kërkojnë që dëshmitë e dhëna me afidavit, deklarime nën betim me vlerë prove në sistemin amerikan, të merren parasysh në procesin ‘Gërdeci’.”- tha Mediu.

Nga ana tjetër, prokurori i SPAK, Klodian Braho, kërkoi që “ i pandehuri të përqendrohet tek objekti i shqyrtimit gjyqësor në fazën që jemi.”

Çështja “Gërdeci” është rihapur pas kërkesës së familjes Durda, një prej viktimave të shpërthimit tragjik të marsit 2008 ku humbën jetën 26 persona.

LEXONI GJITHASHTU:

• Dosja Gërdeci, ish-ministri Fatmir Mediu paraqitet në GJKKO për seancën e radhës
• Gjyqi për Gërdecin në GJKKO, Mediu kundërshton ekspertizën tekniko-ushtarake