Roli i ngushticës së Hormuzit: Bllokimi i saj mund të fusë në kaos ekonominë globale

Një nga mënyrat se si Irani mund të hakmerret ndaj sulmeve izraelito-amerikane është të mbyllë ngushticën e Hormuzit, një aks detar jetik për ekonominë globale, e cila varet ende nga fluksi i naftës.

Ngushtica lidh vendet e pasura me naftë të Gjirit me oqeanin Indian dhe është kanali përmes të cilit qarkullon 20 për qind e furnizimeve me hidrokarbure në botë. Përllogaritjet tregojnë se në ditë, atje mund të kalojnë deri në 20 milionë fuçi nafte dhe gazi.

Me një gjerësi prej 33 kilometrash në pikën më të ngushtë të saj, ajo ndahet nga Irani në veri dhe Omani në jug.

Akset e lundrimit menaxhohen me kujdes përmes një Skeme për Kontrollin e Trafikut, që u lejon anijeve në ardhje të kalojnë nga njëri drejtim dhe atyre në largim në drejtimin tjetër, të ndara nga një vijë detare për të shmangur përplasjet.

Nafta, gazi dhe produkte të tjera derivate që furnizojnë me të ardhura ekonomitë botërore, sidomos Kinën dhe Indinë, kalojnë përmes kësaj ngushtice.

Ndaj, nëse Irani vendos ta bëjë realitet kërcënimin e tij, atëherë mund të dëmtojë seriozisht ekonominë globale, duke rritur çmimet e energjisë.

Por gjithashtu, Republika Islamike do të shihte edhe eksportet e saj të bllokohen dhe do t’i bënte një dëm të pakthyeshëm edhe vetvetes.

Gjithashtu, të rrezikuara janë edhe Shtetet e Bashkuara, që në Bahrein kanë bazën e flotës së pestë të marinës amerikane. Njësitë lundruese të saj patrullojnë rregullisht ngushticën,  por në kohë lufte ato mund të bëhen objekt i sulmeve iraniane me silur dhe dronë.

Pasi parlamenti iranian e aprovoi mbylljen e ngushticës, vendim që për të hyrë në fuqi duhet miratuar edhe nga Këshilli i Sigurisë së vendit, çmimet e naftës në tregjet financiare u rritën 5.7 për qind në 81.40 dollarë për fuçi; çmimi më i lartë në 5 muajt e fundit.

EXONI GJITHASHTU:

• “35 mld ndihmë për Ukrainën”,Rutte: S’do lejojmë Iranin të zhvillojë armë bërthamore
• Erdogan: Po bëjmë përpjekje intensive për të shmangur përhapjen e luftës Izrael-Iran