Një humbje jete në Kosovë nga COVID-19, bie numri i të infektuarve

Kosova raporton se gjendja epidemiologjike e COVID-19 ka shfaqur prirje të qendrueshme dhe këtë e dëshmojnë shifrat e fundit të raportuara nga autoritetet.

Instituti i Shëndetit Publik thekson se një qytetar ka ndërruar jetë, ndërsa nga 2100 teste të kryera, 103 prej tyre kanë rezultuar pozitive.

Nga fillimi i epidemisë në Kosovë kanë humbur jetën 2218 persona, shumica e të cilëve me sëmundje të tjera bashkëshoqëruese.

“Numri total i rasteve pozitive është 106.754 raste nga 561.637 persona të dyshimtë në virusin SARS-CoV-2 dhe 2.218 raste të vdekjes. Gjatë 24 orëve të fundit, janë shëruar 248 pacientë derisa numri i përgjithshëm i të shëruarve deri më sot është gjithsej 98.787 raste, kurse numri i rasteve aktive është 5.749”, njofton IKSHPK.

Rastet pozitive janë nga komunat:

Prishtinë 20 raste, Prizren 12 raste, Ferizaj 9 raste, Gjakovë 9 raste, Drenas 6 raste, Viti 6 raste, Vushtrri 6 raste, Lipjan 5 raste, Fushë-Kosovë 4 raste, Malishevë 4 raste, Mitrovicë 3 raste, Obiliq 3 raste, Pejë 3 raste, Deçan 2 raste, Gjilan 2 raste, Istog 2 raste, Suharekë 2 raste dhe me nga një rast komunat Kamenicë, Kaçanik, Klinë, Podujevë dhe Skenderaj.

Autoritetet kanë kërkuar nga qytetarët të tregojnë kujdes dhe të zbatojnë masat e diktuara kundër COVID-19.