Gonzato: Reforma në drejtësi ka dhënë rezultate, por ka ende shumë punë për të bërë

Ambasadori i Bashkimit Evropian në Tiranë, Silvio Gonzato, mori pjesë në tryezën e diskutimit me temë “Vlerësim bazë i Pavarësisë dhe Llogaridhënies së SPAK si parakushte për Garantimin e Performancës dhe Integritetit Institucional”, organizuar nga Qendra për Studimin e Demokracisë dhe Qeverisjes.

Gjatë fjalës së tij, Gonzato i bëri thirrje institucioneve të drejtësisë që të vijojnë punën për zbatimin e reformës në drejtësi, duke theksuar rëndësinë e ruajtjes së balancës mes pavarësisë dhe llogaridhënies.

“Reforma në drejtësi ka dhënë atë që pritej nga Shqipëria, sa i përket pavarësisë dhe llogaridhënies, si dhe ka kontribuar ndjeshëm në ecurinë e vendit drejt Bashkimit Evropian. Megjithatë, ka ende shumë punë për të bërë, veçanërisht në zbatimin e saj. Vazhdojmë të inkurajojmë të gjitha institucionet përkatëse, përfshirë edhe ato të pavarura të drejtësisë, të punojnë me këtë qëllim në mendje”, deklaroi ambasadori i BE-së.

Duke e cilësuar SPAK-un si një institucion kyç, Gonzato theksoi rëndësinë e ndaljes së çdo presioni ndaj drejtësisë së re.

“Vendimet gjyqësore kanë ndikim të drejtpërdrejtë në jetën e qytetarëve. Pavarësia pa llogaridhënie rrit rrezikun për abuzim me pushtetin. Në raportet tona të zgjerimit, përfshirë edhe ato mbi sundimin e ligjit, kemi theksuar se arkitektura e reformës në drejtësi ofron një balancë të drejtë mes pavarësisë dhe llogaridhënies”, tha Gonzato.

LEXONI GJITHASHTU:

• Reforma në drejtësi, korrupsioni e politika, çfarë thotë raporti i KE për Shqipërinë
• “Reforma në drejtësi nuk preket”- Rama: Çdo hap sipas negociatave të BE